O‘zbekistonda AES quriladigan maydon yaqinidagi ko‘llar hududlari ijaraga beriladi

Biznes qilish uchun Aydar—Arnasoy ko‘llar tizimidagi uchastkalar onlayn-auksionga qo‘yildi. Ular ijaraga beriladi. Bu haqda Spot xabar berdi.

Aydarko‘l, Tuzkon, Sharqiy Arnasoy ko‘llari baliqchilik va turizm markaziga aylantirilishi ko‘zda tutilgan.

Bu hududda ko‘llarning biologik xilma-xilligini saqlagan holda baliqchilik va turizm markazi yaratish ko‘zda tutilgan. Shu orqali to‘g‘ridan to‘g‘ri investitsiyalar oqimi ham ta’minlanadi.

Tizimning bo‘sh suv havzalari ijaraga beriladi. Saytda bu lotlar uchun maxsus bo‘lim ochilgan. E’lon qilinishi vaqtida 11 ta uchastka savdoga qo‘yilgan.

Yillik ijara narxi 12—13 million so‘m etib belgilangan. Ayrim lotlarning qiymati 50 million so‘mdan ziyodni tashkil etadi. Har bir hududning maydoni (2000 gektar atrofida) va baliqchilik mahsulotdorligi (kilogrammda) ko‘rsatib o‘tilgan.

Arizalar 26-avgustga qadar qabul qilinadi, savdolar 28-avgustga belgilangan.

Kelgusida ko‘llar yaqinida baliq va baliqchilik mahsulotlari savdo yarmarkalari o‘tkaziladi. Ikki yil davomida ko‘l hududi maxsus transportlar, katerlar, GPS-navigatorlar, video kuzatuvlar uchun uchuvchisiz uchar qurilmalar va boshqa texnik vositalar bilan ta’minlanadi.

Qolaversa, ko‘llarga olib boruvchi avtomobil yo‘llarini rekonstruksiya qilish va ta’mirlash, hudud joylashuvi bo‘yicha elektron xaritani bosqichma-bosqich yaratish ko‘zda tutilgan.

Shu yil may oyi oxirida O‘zbekistonda AES qurilishi uchun Aydar—Arnasoy ko‘llar tizimining Tuzkon ko‘li yaqinidagi hudud ustuvor maydon sifatida tanlangani ma’lum qilingandi.