Futbol bo‘yicha 9—11-avgust kuni Fransiya chempionati 2019/20-yilgi mavsumining 1-turidan o‘rin olgan uchrashuvlar bo‘lib o‘tdi. “Daryo” esa tur tafsilotlarini taqdim qiladi.

“Monako”—“Lion”

Foto: Twitter/@OL

Yangi mavsumning ochilish o‘yinida “Monako” va “Lion” jamoalari o‘zaro to‘qnash keldi. Mazkur o‘yinda “Lion” raqibiga imkon qoldirmadi (3:0). Uchrashuvdagi gollarga Mussa Dembele, Memfis Depay hamda Tuzar mualliflik qildi. O‘tgan mavsum bir amallab musobaqada jon saqlab qolgan Leonardu Jardim boshchiligdagi “Monako” o‘yin borasida yomon ko‘rinmadi, biroq birinchi bo‘limdayoq Fransesk Fabregasning chetlatilishi va saviya orasidagi farq o‘z so‘zini aytmay qolmadi.

“Marsel”—“Reyms”

Foto: Twitter/@StadeDeReims

Turning kichik sensatsiyasi Marselda ro‘y berdi. O‘tgan mavsum yakunlariga ko‘ra, yevrokuboklarda ishtirok etish huquqidan bebahra qolgan marselliklar o‘z maydonida “Reyms”ga imkoniyatni boy berib qo‘ydi (0:2). Fransiyalik Bulaye Dia va Janubiy koreyalik Sok Hyon Chunning gollari mehmonlarga g‘alaba keltirdi.

“Monpelye”—“Renn”

“Monpelye” va “Renn” jamoalari o‘rtasidagi uchrashuv ham qiziqarli tarzda o‘tdi (0:1). Dastlab o‘z darvozasidan to‘p olib chiqqan “paladinlar” ikkinchi bo‘limda penaltidan unumli foydalana olmadi, buning ustiga “Renn” bo‘limning yarmini kamchilikda o‘tkazgandi. Mazkur o‘yinda vaziyatlardan foydalana olmaslik maydon egalariga qimmatga tushdi. Biroq ayni damda “Monpelye” transfer bozorida faollashgan va yaqin orada bir qator futbolchilarni o‘z safiga qo‘shib olishi kutilmoqda.

“Lill”—“Nant”

Foto: Twitter/@losclive

Ushbu yozda bir nechta yetakchisini sotib yuborgan “Lill” o‘z maydonida “Nant”ni qabul qildi. Uchrashuvda “Lill”ning yangi futbolchisi Viktor Osimhen dubl qayd etib, jamoasining g‘alabasini ta’minladi. Nikolya Pepega o‘rinbosar sifatida ko‘rilayotgan 20 yoshli nigeriyalik futbolchi ilk rasmiy uchrashuvidayoq o‘zini ko‘rsatishga muvaffaq bo‘ldi. O‘tgan mavsumni Belgiyaning “Sharlerua” klubida o‘tkazgan hujumchini “Lill” mazkur transfer mavsumida “Volfsburg”dan sotib olgandi.

Foto: Twitter/@PSG_inside

PSJ—“Nim”

Turga yakun yasab bergan bahs Parijda bo‘lib o‘tdi. Unda amaldagi chempion PSJ “Nim” klubini yirik hisobda taslim etdi (3:0). Edinson Kavani, Kilian Mbappe va Anhel di Mariyaning gollari parijliklarga uch ochko keltirdi. Mazkur o‘yinga PSJ Neymarni jalb qilmadi, keyingi turga qadar braziliyalik futbolchi jamoasini amashtirib qolishi ham mumkin.

Mazkur turda ikkita o‘yinda durang natija qayd etildi, qolgan barcha bahslarda g‘olib nomi aniqlandi. Bundan tashqari, har bir uchrashuvda kamida bitta gol qayd etildi.

O‘yinlarda kiritilgan barcha gollarni @daryo_sport Telegram kanalida tomosha qilish mumkin.

Liga 1

1-tur bahslari

9-avgust, juma

“Monako”—“Lion” 0:3

Gollar: 0:1 — 5 Dembele, 0:2 — 36 Depay, 0:3 — 80 Tuzar

10-avgust, shanba

“Marsel”—“Reyms” 0:2

Gollar: 0:1 — 58 Dia, 0:2 — 90  Sok Hyon Chun

“Nitssa”—“Amyen” 2:1

Gollar: 1:0 — 32 Erey, 1:1 — 81 Akolo, 2:1 — 90 Dante

“Anje”—“Bordo” 3:1

Gollar: 0:1 — 4 de Previl, 1:1 — 27 Ren-Adelaid, 2:1 — 33 Pereyra Laje, 3:1 — 45 Mangani

“Dijon”—“Sent-Etyenn” 1:2

Gollar: 0:1 — 5 Amuma, 0:2 — 11 Axolu, 1:2 — 34, penalti, Tavaresh

“Brest”—“Tuluza” 1:1

Gollar: 1:0 — 25 Otre, 1:1 — 89 Kuluris

“Monpelye”—“Renn” 0:1

Gol: 0:1 — 6 Morel

11-avgust, yakshanba

“Lill”—“Nant” 2:1

Gollar: 1:0 — 19 Osimxen, 1:1 — 51, avtogol, Chelik, 2:1 — 80 Osimxen

“Strasburg”—“Mets” 1:1

Gollar: 1:0 — 21 Tomasson, 1:1 — 47 Diallo

PSJ—“Nim” 3:0

Gollar: 1:0 — 24, penalti, Kavani, 2:0 — 56 Mbappe, 3:0 — 69 di Mariya

Nodirxon Hamidxonov tayyorlandi