“Mikrokreditbank” ATBning viloyatlardagi kichik biznes va tadbirkorlik subyektlari bilan sayyor uchrashuvlari davom etmoqda

Ana shunday uchrashuvlarning navbatdagisi bankning mas’ul rahbarlari hamda Buxoro viloyatidagi tadbirkorlar o‘rtasida bo‘lib o‘tdi. Bu kabi uchrashuvlarning maqsadlari quyidagilar:

• tadbirkorlik subyektlarining huquq va manfaatlarini himoya qilish;
• ularni qiynab kelayotgan muammolarni joyiga chiqqan holda o‘rganish hamda bartaraf etish;
• davlat va mahalliy dasturlarga kiritilgan barcha loyihalarni o‘z vaqtida moliyalashtirish.

Ochiq muloqotlar davomida hech qanday sansalorliklarsiz bank xizmatlari ko‘rsatish, tadbirkor xalqimiz dardlariga malham bo‘lish bugungi kunning eng muhim va dolzarb vazifalaridan biri ekanligi alohida ta’kidlandi.

Kichik biznes vakillariga bank qonunchiligi bo‘yicha ko‘plab huquqiy ma’lumotlar berildi. Jumladan, eksport va eksportoldi moliyalashtirish qoidalari, eksport kreditlari va tavakkalchilikni sug‘urtalash mexanizmlarini samarali tashkil etish, Vazirlar Mahkamasi huzuridagi Tadbirkorlikni rivojlantirishni qo‘llab-quvvatlash jamg‘armasi orqali kredit foizlarni kompensatsiyalash va kafillik berish tartiblari bo‘yicha atroflicha ma’lumot berildi.

Sayyor uchrashuvlarda kichik biznes va tadbirkorlik subyektlaridan tushgan 74 ta murojaatning 27 tasida aks etgan loyihalar bevosita joyida hal etildi. Qolgan 47 ta, ya’ni qo‘shimcha o‘rganish talab etiladigan murojaatda ko‘tarilgan masalalarni qisqa muddatlarda hal etish choralari ko‘rilib, hududlardagi mutasaddi rahbarlarga aniq muddati belgilangan holda qat’iy vazifa va topshiriqlar berildi.

Jumladan, Buxoro viloyati Romitan tumanida faoliyat ko‘rsatayotgan “Zinnat Zafar Jafar” MChJ tomonidan Xitoy davlatidan beton va plita mahsulotlari ishlab chiqarish mini zavodini olib kelish uchun (Tadbirkorlikni rivojlantirishni qo‘llab-quvvatlash jamg‘armasining 3 foizli kompensatsiyasi bilan) 200 million so‘m kredit ajratish masalasi hal etildi.

Eslatib o‘tamiz, bu kabi tadbirlar O‘zbekiston Respublikasi Prezidenti huzurida joriy yilning 2-avgust kuni o‘tkazilgan videoselektor yig‘ilishida tijorat banklariga yuklatilgan topshiriqlar ijrosini ta’minlash doirasida o‘tkazilmoqda.

Reklama huquqi asosida.