Muzrabot tumani hokimligi “Yurtim jamoli” mahallasida yashovchi tadbirkor Abdulatif To‘raqulovga tegishli xususiy korxona binosi va yer uchastkasini olib qo‘yilayotgani  haqida ijtimoiy tarmoqlarda tarqalgan xabar yuzasidan o‘z munosabatini bildirdi. Bu haqda viloyat hokimligi matbuot xizmati ma’lum qildi.

Foto: Surxondaryo viloyat hokimligi matbuot xizmati

Xabar berilishicha, Prezident qaroriga asosan, bo‘sh turgan bino-inshootlarni aniqlash, tegishli tartibda o‘rganish va bo‘sh turgan obyektlar va yer uchastkalarini davlat hisobiga qaytarish maqsadida boshqa xususiylashtirilgan inshootlar qatori  fuqaro A.To‘raqulov rahbarligidagi “Termiz”  ko‘p tarmoqli xususiy korxonasiga qarashli tuzni qadoqlash binosida ham monitoring o‘tkazilgan.

Muzrabot tumani hokimligi, tuman Davlat soliq inspektsiyasi, “yer tuzish va ko‘chmas mulk kadastri” davlat korxonasi tuman filiali vakillari ishtirokida o‘tkazilgan ushbu o‘rganish natijalariga ko‘ra, korxonaga qarashli 0,46 ga (bino-inshootlari 352 kv.metr) yer maydonida joylashgan ishlab chiqarish binolari hamda yer uchastkasidan uzoq vaqtdan buyon foydalanilmasdan kelinayotganligi aniqlanib, tegishli tartibda dalolatnoma tuzilgan.

Shunga muvofiq, 2019-yilning 4-iyulida tuman hokimligi davlat mulki obyektini davlat tasarrufidan chiqarish bilan bog‘liq davlat organi harakatlarini noqonuniy deb topish va bo‘sh turgan bino-inshootlarni (yer maydonlarini) davlat tasarrufiga qaytarish to‘g‘risida tuman Ma’muriy sudiga da’vo arizasi kiritgan.

Sudda mazkur da’vo arizasi yuzasidan ish ko‘rilishi belgilangunga qadar, ya’ni, 2019-yilning 31- iyul kuni Respublika Oliy sudi tomonidan quyi sud organlariga Davlat aktivlarini boshqarish qo‘mitasi (Davlat mulk qo‘mitasi) va ularning viloyat boshqarmalariga nisabatan buyruq hamda orderni haqiqiy emas deb topish to‘g‘risida kiritilayotgan arizalar faqat prokurorlar tomonidan imzolangandagina qabul qilinishi, hokimlar tomonidan imzolangan bunday arizalar ro‘yxatdan o‘tkazilmasdan qaytarib berilishi (qabul qilinmasligi) to‘g‘risida ma’lum qilinadi.

Shunga muvofiq, 2019-yilning 1-avgust kuni Muzrabot tumani Ma’muriy sudi tuman hokimligi tomonidan “Termiz” ko‘p tarmoqli xususiy korxonasiga nisbatan kiritilgan da’vo arizasini sudda ko‘rmasdan qoldirib, arizani tuman hokimligiga qaytardi.

Ushbuni inobatga olib, Muzrabot tumani hokimligi A.To‘raqulov rahbarligidagi “Termiz”  ko‘p tarmoqli xususiy korxonasiga qarashli ishlab chiqarish binosi va yer uchastkasi olib qo‘yilmasligini hamda ulardan samarali foydalanishda fuqaroga amaliy yordam ko‘rsatilishini ma’lum qiladi.