Chaqiriqqa yo‘l olgan tez yordam mashinalari haydovchilari tezlikni qayd etuvchi fotoradar va kameralarga tushgani uchun jarimaga tortilmaydi. Bu haqda Toshkent shahar Ichki ishlar bosh boshqarmasi xabar berdi.
Qonunchilikda bu kabi holatlar ko‘zda tutilgan moddalar mavjud. Xususan, O‘zbekiston Respublikasi Ma’muriy javobgarlik to‘g‘risidagi kodeksning 271-moddasi 4-qismiga muvofiq, “shaxs harakatni (…) oxirgi zarurat holatida qilgan bo‘lsa”, ma’muriy huquqbuzarlik to‘g‘risidagi ishlarni yuritishni boshlash mumkin emas, boshlangan ish esa tugatilishi lozim. Ushbu zarurat fakti aniqlanganda, qayd etilgan qoidabuzarlik fakti tugatiladi. Bu tez yordam, yong‘in xavfsizligi va ichki ishlar organlari avtomobillari kabi barcha maxsus transportlarga taalluqlidir.
Tez yordam xodimlari chaqiriqqa yo‘l olgandan so‘ng avtomatlashtirilgan nazorat kameralari tomonidan qoidabuzarlik qayd etilib, jarima solingani to‘g‘risida qaror xati kelgan taqdirda, ular Toshkent shahar IIBB YHXB YHXKBTga (yo‘l harakati xavfsizligini kompyuterlashtirilgan boshqaruv tizimi bo‘limiga) javob xati bilan murojaat qilishlari zarurligi, shundan so‘ng esa qaror bekor qilinishi haqida xabardor.
Tez yordamning javob xati quyidagi ko‘rinishga ega:
Bekor qilingan jarima qarorlari bo‘yicha statistika ma’lumotlariga ko‘ra, 2017-yilda 321 ta jarima to‘g‘risidagi qaror bekor qilingan bo‘lsa, 2018-yilda — 221 ta, 2019-yilning birinchi yarmida 292 ta qaror bekor qilingan. 2019-yil iyul oyining o‘zidayoq YHXKBT xodimlari bu kabi 124 ta qarorni bekor qildi.
Maxsus transportlar haydovchilari tomonidan qoidabuzarlikka yo‘l qo‘yilgan vaqtda avtomobil chaqiriqqa yo‘l olayotgan bo‘lganligi haydovchilarning rahbariyati tomonidan tasdiqlangan taqdirdagina qarorlar bekor qilinadi. Yo‘l harakati qoidalariga muvofiq, bu kabi holatlarda tez yordam haydovchilari yonib-o‘chadigan signal va maxsus ovoz signalini qo‘shishi shart. Agarda maxsus transport chaqiriqqa yo‘l olmayotgan bo‘lsa, qoidalarni buzishga ham ehtiyoj yo‘q (tez yordam haydovchilari ko‘pincha suiiste’mol qiladigan holat), shuning uchun, bu kabi holatlarda qaror bekor qilinmaydi.
Shuni ta’kidlash kerakki, Tez yordam xodimlari YHXKBTga javob xati jo‘natishi shart: bu xatsiz YHXKBT xodimlari chaqiriqqa yo‘l olgan haydovchi kameralar tomonidan qoidabuzar sifatida qayd etilganini bila olmaydi. Kameralar qoidabuzarliklarni avtomatik tarzda qayd etadi (inson aralashuvisiz), qaror ham avtomatik tarzda tuziladi va darhol “O‘zbekiston pochtasi” AJga manzilga jo‘natilishi uchun yo‘naltiriladi. Ma’lumotlarga ko‘ra, barcha Tez yordam bo‘linmalari huquqshunoslari javob xati yo‘llash zarurligi to‘g‘risida xabardor qilingan.
Izoh (0)