Monopoliyaga qarshi kurashish qo‘mitasi ijtimoiy tarmoqlarda go‘sht narxi oshgani yuzasidan bildirilayotgan noroziliklarga munosabat bildirdi. Bu haqda qo‘mita matbuot xizmati ma’lum qildi.
Ta’kidlanishicha, O‘zbekiston Respublikasi Statistika qo‘mitasi bergan ma’lumotlarga ko‘ra, joriy yilning 1-aprel holatiga tirik vaznda go‘sht ishlab chiqarish hajmlarini 94,3 foizi dehqon (shaxsiy ) xo‘jaliklariga, 4,8 foizi fermer xo‘jaliklariga va 0,9 foizi qishloq xo‘jalik faoliyati bilan shug‘ullanuvchi korxonalar hissasiga to‘g‘ri kelgan.
Ma’lumotlardan ko‘rinib turibti, go‘sht bozorida hech qanday monopoliya yo‘q va unda raqobat shakllangan. Shuningdek, bu o‘z navbatida respublikada go‘sht bozorining talab va taklifdan kelib chiqib barqaror ishlab chiqarishni ta’minlaydigan sanoat ishlab chiqarish ulushi juda kamligini ko‘rsatadi.
O‘zbekiston Respublikasi Vazirlar Mahkamasining 2018-yil 30-martdagi 249-son qarori bilan Narxlari (tariflari) davlat tomonidan tartibga solinadigan ijtimoiy ahamiyatli tovarlar (xizmatlar) va ularning strategik turlari ro‘yxati tasdiqlangan. Unga ko‘ra, go‘sht ushbu ro‘yxatga kiritilmagan va uning narxi ishlab chiqaruvchi tomonidan mustaqil ravishda belgilanadi.
“Ta’kidlash joizki, bugungi kunda Qo‘mita tomonidan go‘sht bozori o‘rganilmoqda. O‘rganish yakuni bo‘yicha Qo‘mita aynan shu sohada tadbirkorlik faoliyatini yanada rivojlantirishga qaratilgan takliflar va chora-tadbirlar dasturini ishlab chiqadi”, — deyiladi xabarda.
Izoh (0)