O‘zbekistonda tug‘ilgan uchta egizak bolalarning har biriga nafaqa puli berilishi lozim. Bu haqda O‘zbekiston inson huquqlari bo‘yicha milliy markazi direktori Akmal Saidov jurnalistlar bilan muloqotda aytib o‘tdi, deya xabar bermoqda “Daryo” muxbiri Musulmonbek Ibrohimov.
Vazirlar Mahkamasining 2013-yil 15-fevraldagi 44-sonli qarorining “Kam ta’minlangan oilalarga ijtimoiy nafaqalar va moddiy yordam tayinlash va to‘lash tartibi haqida”gi nizomga muvofiq, bola parvarishi uchun to‘lanadigan nafaqa bolalar egiz tug‘ilsa ham bitta bola uchun ajratilishi belgilangan.
“Daryo” muxbiri uchta egizakning faqat bir nafariga nafaqa ajratilishi qay darajada o‘rinli ekanligiga izoh berishlarini so‘rab, savol bilan murojaat qildi.
Akmal Saidovning fikricha, egizaklarning uchalasiga ham nafaqa puli berilishi maqsadga muvofiq.
“Nima uchun bunaqa qilinganiga haligacha tushunmayman. O‘zbekiston parlamentida uzoq yil deputat bo‘lib ishlagan menman, 5 marta saylanganman. Qachon shunaqa qonunlar o‘tkaziladi? Qonun qabul qilishga 2-3 kun qolganda qo‘shimcha keladi. O‘zgartirish kiritilayotganda ko‘pincha ulgurmay ham qolasiz. Oldin ham shunaqa bo‘lardi. Men shunda bizda ham lobbizm bor ekan, deb aytar edim. Masalan, “Reklama to‘g‘risida”gi qonunda tushunmovchiliklar ko‘p bo‘lgan, keyinchalik sezganmiz. O‘ylaymanki, bu mantiqsizlik. Uchta tug‘ilgan bolaning ikkitasi begonami yoki yetimmi? Agar tenglik bo‘ladigan bo‘lsa, uchalasiga ham mablag‘ ajratilishi kerak”, — dedi markaz rahbari.
Oldinroq, Samarqand viloyati Urgut tumanidagi To‘rtko‘l mahallasida dunyoga kelgan uch egizak – Shavkatbek, Ziroatxon va Saidaxon haqida maqola chop etilgan edi. Materialda taxminan uch oy muqaddam tug‘ilgan bolalarga mas’ul tashkilotlar tarafidan e’tibor qaratilmagani, ayni paytda oila moddiy qiyinchiliklarga duch kelayotgani aytilgan edi. Shundan so‘ng urgutlik egizaklarga kir mashinasi sovg‘a qilindi, bolalar tibbiy ko‘rikdan o‘tkazildi.