“Maxsustrans” korxonasi qo‘shimcha ravishda 51 mingdan ortiq aholiga xizmat ko‘rsatishni yo‘lga qo‘ydi

2019-yilning o‘tgan yetti oyi davomida Toshkent shahridagi alternativ boshqaruv kompaniyalari tomonidan xizmat ko‘rsatilayotgan Shayxontohur, Olmazor, Bektemir, Yashnobod tumanidagi bir nechta mahallalar tuman hokimlarining tegishli qarorlari bilan tuman “Maxsustrans” DUK IChBning avtotransport filiallariga qaytadan biriktirildi, bu haqda “Maxsustrans” matbuot xizmati “Daryo”ga xabar qildi.

Buning natijasida “Maxsustrans” korxonasiga mazkur tumanlarda yashovchi jami 51372 nafar aholi qo‘shilgan.

Qayd etish joizki, hududlarda sanitar holatni yaxshilash, boshqaruv kompaniyalarining mavzelardan maishiy chiqindilarni o‘z vaqtida sifatli olib chiqilishini ta’minlash maqsadida Toshkent shahridagi ba’zi mahallalardan maishiy chiqindini olib chiqib ketish xizmati alternativ boshqaruv kompaniyalariga biriktirilgan.

Joriy yilning ilk yetti oyi yakunlariga ko‘ra, “Maxsustrans” tomonidan 721 ming metr kub qattiq maishiy chiqindilarni olib chiqish amalga oshirilgan bo‘lib, ularni olib chiqish uchun 415 ta chiqindi yig‘ish avtomashinasi safarbar qilindi.

Amalga oshirilgan ishlar natijasida o‘tgan yetti oyda “Maxsustrans” korxonasining tushumi qariyb 46 milliard so‘mni tashkil qildi.

Ma’lumotlarga ko‘ra, “Maxsustrans” tomonidan bir kecha-kunduzda mahalla va korxonalardan 1800 tonna chiqindi olib chiqiladi.