Shu yil avgust oyi boshida Innovatsion rivojlanish vazirligi huzuridagi Innovatsion rivojlanish va novatorlik g‘oyalarini qo‘llab-quvvatlash jamg‘armasi tomonidan Mirzo Ulug‘bek nomidagi ixtisoslashtirilgan davlat umumta’lim maktab-internati uchun Meade LX600 teleskopi sotib olingandi. Bu haqda “Daryo”ga vazirlik matbuot xizmati ma’lum qildi.

Foto: Innovatsion rivojlanish vazirligi

Teleskop mutaxassis-astronomlar ko‘magida maktab binosining yuqori qismida maxsus qurilgan pavilonga o‘rnatildi. Pavilonning gumbazi, ya’ni yarim sfera shaklidagi tom qismi aylanadi va unda osmonni kuzatish uchun ikki tomonga ochiladigan maxsus tirqish-eshik mavjud.

Foto: Innovatsion rivojlanish vazirligi

Ushbu teleskop AQShning Meade Instruments firmasi tomonidan ishlab chiqarilgan. Uning ko‘zgusi diametri 40 santimetr, fokus masofasi esa 325 santimetr bo‘lib, 140 ming osmon jismini o‘ta katta aniqlik bilan topa oladi. Teleskop GPS tizimi va Autostar II masofadan boshqaruv pulti bilan jihozlangan. Ushbu jihozlar yordamida teleskop to‘liq avtonom rejimda o‘zini-o‘zi sozlash va kuzatuvlarni dasturlash imkoniyatiga ega.

Foto: Innovatsion rivojlanish vazirligi

Teleskop yuqori sifatli optikaga ega bo‘lgan Shmidt-Kassegren sxemasiga ega bo‘lib, osmon jismlarini  100 martadan 800 martagacha kattalashtirish imkoniyatiga ega. Uning yordamida Oy, sayyoralar va ularning yo‘ldoshlari, asteroidlar va kometalar, yulduzlar va ularning to‘dalari, tumanlik va galaktikalarni kuzatish mumkin.