BMTning O‘zbekistondagi vakolatxonasi Shavkat Mirziyoyevning “Jasliq” koloniyasining yopilishi to‘g‘risidagi qarorini qo‘llab-quvvatladi. “Gazeta.uz”ning yozishicha, bu haqda BMTning doimiy koordinatori Xelena Freyzer bayonotida keltirilgan.
Xabarda aytilishicha, “Jasliq” koloniyasidagi ayanchli saqlash sharoitlari 2002-yilda O‘zbekistonga tashrif buyurgan BMTning qiynoqlar bo‘yicha maxsus ma’ruzachisi Teo van Boven tomonidan tanqid qilingan.
Ushbu tashrif chog‘ida u “Hukumat hatto o‘zining joylashuvi bilan shafqatsiz, g‘ayriinsoniy va inson qadr-qimmatini kamsituvchi munosabat yoki jazoga teng sharoit yaratuvchi ‘Jasliq’ koloniyasini yopish masalasini zudlik bilan ko‘rib chiqishi lozim”ligini ta’kidlagan.
Milliy qonunchilikka muvofiq, ushbu muassasadagi mahbuslarning oila a’zolari ular bilan uchrashish uchun uzoq yo‘l yurmasligi maqsadida mahbuslar avvalgi yashash joyi yaqinidagi koloniyaga ko‘chish huquqiga ega.
“Jasliq” koloniyasida saqlanayotgan barcha mahbuslarning oila a’zolari ular ko‘chirib o‘tkaziluvchi muassasa haqida o‘z vaqtida va tegishli ravishda xabardor qilinishi lozim.
Prezident qarorida “Jasliq” koloniyasining barcha moddiy resurslari va xonalari Qoraqalpog‘iston Ichki ishlar vazirligining tergov hibsxonasi sifatida foydalanish uchun berilishi ko‘zda tutilgan.
Shuningdek, BMT undan dastlabki tergov paytida hibsda saqlash joyi sifatida va jinoiy sud ishlarida boshqa maqsadlarda foydalanmaslik zarurligini ta’kidlab o‘tgan.
Izoh (0)