Andijonda 10 yildan buyon farzand ko‘rishni orzu qilayotgan oila bir yo‘la uch egizakli bo‘ldi

Andijonlik Muyassarxon Mamatqulova viloyat skrining markazida uch nafar egizakni dunyoga keltirdi.

Baliqchi tumani, Olimbek mahallasida yashovchi Javlonbek va Muyassarxon Mamatqulovlar oila qurganlariga qariyb o‘n yil bo‘ldi. O‘tgan ana shu yillar davomida ularga farzand ko‘rish nasib etmadi.

Ko‘p davolanishdi, kimlardir ularga ajrashishni maslahat berdi. Lekin bu ikki yosh har qanday gap-so‘zlarga qaramasdan oilasini barbod qilmadi, farzandli bo‘lish umidi bilan yashadi.

Yaratganning marhamati bilan ular bir yo‘la uch egizakning ota-onasiga aylandi. Egizaklarga Fotima, Muhammadaziz va Zuhra deb ism qo‘yildi. Shifokorlarning ta’kidlashlaricha, ona va egizaklarning salomatligi yaxshi. Bir-ikki kun ichida uylariga ketish uchun ruxsat berilar ekan.