Ertaga, 7-avgust kuni soat 14:30 dan 15:00 ga qadar Markaziy harbiy okrug hududidagi Kuchishlatar tuzilmalar hamkorligida katta masshtabda harbiy o‘quv mashg‘ulotlari o‘tkazilishi rejalashtirildi. Bu haqda Markaziy harbiy okrug matbuot xizmati “Daryo”ga xabar qildi.
Ushbu mashg‘ulot tufayli xalqaro ahamiyatdagi M39 “Almati—Bishkek—Toshkent—Termiz” avtomobil yo‘lidagi Zarafshon daryosi ustidan o‘tgan ko‘prikda avtomobil harakatlari vaqtincha cheklanadi.
Uzunligi 160 metr, qatnov qismi esa 10 metrdan iborat bo‘lgan ushbu ko‘prik ustunlariga shartli noqonuniy qurollangan shaxslar tomonidan o‘rnatilgan uzoq masofadan boshqariluvchi minadan tozalanish ishlari hamda qurolli kishilarni qo‘lga olish tadbiri tezkor va maxsus bo‘linmalar hamkorligida amalga oshiriladi. Shu bilan birga mazkur ko‘prikka parallel ravishda yotqizilgan temir yo‘l ko‘prigida ham harbiy o‘quv amaliyot o‘tkazilishi ko‘zda tutilgan.
“Shu munosabati bilan ushbu yo‘nalishda harakatlanayotgan yengil avtomobil va yuk mashinalari hamda fuqarolardan oldindan yuzaga keladigan noqulayliklar uchun uzr so‘raymiz”, — deyiladi xabarda.
Izoh (0)