Bugun,

  • USD 11014.01
  • RUB 191.8
  • EUR 10674.78

Qashqadaryo viloyati IIB Qarshi tuman IIB boshlig‘i Bahodir Arslonovning xatti-harakatlari haqida so‘z borgan “‘Militsiya boshlig‘i uyimga bostirib kirib tintuv o‘tkazgach, bolalarim qo‘rqib ketgan’. Qashqadaryolik fermer IIB boshliqlarining navbatdagi zo‘ravonligi fosh etdi” nomli maqolani rad etib, tuman IIB boshlig‘ining sha’ni va qadr qimmatini kamsituvchi deya baholadi.

Bahodir Arslonov.

Bahodir Arslonov.
Foto: IIV

Viloyat IIB raddiyasida shunday deyiladi:

2019-yilning 21-iyul kuni taxminan soat 17:00 larda tuman IIB boshlig‘iga, tuman hududida viloyat rahbariyati tomonidan tumandagi qoloq fermerlar bilan ishlash yo‘nalishida yig‘ilish o‘tkazilishi munosabati bilan yig‘ilishda ishtirok etish uchun tuman IIB boshlig‘ining sektorida bo‘lgan Charog‘il MMTP hududidagi “Parizoda Ro‘ziqulova” fermer xo‘jaligi boshqaruvchisi Bekzod Farmonov yig‘ilishga kelishdan bosh tortganligi ma’lum qilingan.

Mazkur holatga aniqlik kiritish maqsadida tuman IIB boshlig‘i fuqaro B.Farmonovning yashash manziliga kelib, uning turmush o‘rtog‘i M.Ro‘ziyevadan uning qayerda ekanligini so‘raganidan so‘ng, u turmush o‘rtog‘i B.Farmonovga telefon qilgan. Shu qo‘ng‘iroqdan so‘ng, B.Farmonov uyiga kelganida, tuman IIB boshlig‘i u bilan suhbat o‘tkazish jarayonida B.Farmonovning hovlisida 10–15 ta yoqilg‘i bilan ifloslangan yelim idishlar turganligini ko‘rib, B.Farmonovga davlat tomonidan daladagi g‘o‘zani kultivatsiya qilish ishlarida ishlaydigan texnika uchun ajratiladigan yoqilg‘idan belgilangan tartibda foydalanmay, qonunga xilof ravishda o‘tkazishda hamda yong‘in xavfsizligi talablariga rioya qilmagan holda yoqilg‘i mahsulotini uyida saqlab turganligi sababli bu holatga huquqiy baho berishlik uchun B.Farmonovning yashash manziliga tuman FVB yong‘in xavfsizligi inspektorini hamda Charog‘il MFY raisi M.Eshmurodovni taklif qilgan.

E’tibor bering, fermer telefonda “yig‘ilishga bormayman”, degan bir og‘iz so‘z uchun tuman IIB boshlig‘i fermerni uyiga izlab boryapti. Xuddiki, u jinoyat qildiyu, jinoyatchini topib kelishi kerakdek. Hali yig‘ilishga bormay qolmadi. Bormayman deb aytdi, xolos. Holbuki, yig‘ilish kechki soat 18:30 da. Bir og‘iz “bormayman” degan so‘z IIB boshlig‘ining shuncha vaqtini yo‘qotib, fermer xonadoniga kelib xonadonni ko‘zdan kechirishiga sabab bo‘lyapti. Demakki, tuman IIB boshlig‘i bekorchi bo‘lgan degan xayol o‘tadi kishidan. Yo‘qsa, kimsan IIB boshlig‘i telefonda aytilgan bir og‘iz so‘zning ketidan quvib shuncha yo‘l bosarmidi? Shunchaki yig‘ilishga nega bormasligining sababini bilmoqchi bo‘lsa, telefon orqali so‘rasa ham bo‘lardi-ku.

Qolaversa, IIB boshlig‘i fermer xonadonida noqonuniy saqlanayotgan yoqilg‘i borligini qanday bildi? Uyni tintmagan bo‘lsa? Binobarin yoqilg‘i yashirilmasdan hovlida saqlanayotgan ekan, demakki, yoqilg‘i quyish shoxobchasi talabga javob bermagani bois, fermer bu ishni ochiqchasiga qilgan. Shu o‘rinda viloyat IIBga bir savol: Hududdagi yoqilg‘i quyish shoxobchasi talabga javob bermagach, dala ishlari uchun atalgan yonilg‘i qayerda saqlanishi kerak?

Munosabatga qaytamiz yana:

Hodisa joyiga yetib kelgan tuman FVB yong‘in xavfsizligi inspektori T.Saidov o‘z navbatida B.Farmonov tomonidan yashash xonadonida qonunga xilof ravishda yoqilg‘i saqlanayotganlik holatini hujjatlashtirishi davomida B.Farmonov “Sen meni uyimga bostirib kirishga nima haqqing bor”, deb holatni uyali telefoniga tasvirga tushirish uchun telefon apparatini turmush o‘rtog‘i M.Ro‘ziyevaga bergan. Hodisa joyini M.Ro‘ziyeva video tasvirga olmasligi haqida Charog‘il MFY raisi M.Eshmurodov, Charog‘il MMTP raisi Sh.Qiyomovlar aytib ogohlantirishlariga qaramasdan u o‘z harakatini davom ettirib, holatni ziddiyatli ko‘rinishga keltiruvchi harakatlarni sodir eta boshlagan. Fuqaro M.Ro‘ziyeva tegishli hujjatlarni rasmiylashtirishga to‘sqinlik qilib, telefonda tasvirga olishni davom ettirgani uchun undan telefon apparatni taqdim qilish so‘ralgan.
Bo‘layotgan jarayonni telefonga tasvirga olish tegishli hujjatlarni rasmiylashtirishga qanday qilib xalal berishi mumkin? IIBning mazkur jumlasi ham maqolada tilga olingan holatni tasdiqlaydi. Demakki, fermerning ayoli IIB nazdi bilan aytganda qonuniy xatti-harakatni tasvirga ola boshlagan. IIB boshlig‘i esa xuddi boshqarma boshliqlari kabi bu videotasvirlar ziddiyatli holatni yuzaga keltiradi deb o‘ylagan (yoki qo‘rqqan). Va telefonni tortib olgan. Telefon tortib olinganini IIBning o‘zi ham tasdiqlayapti. IIB boshlig‘i o‘z harakatining qonuniyligiga ishonsa, nega telefonni tortib oldi? IIB boshlig‘i syomka qilingan videotasvirdan nega bunchalik qo‘rqdi? Telefonda IIB boshlig‘ini qo‘rqitadigan nima bor?

IIB boshqarmasining rasmiy munosabati shunday davom etadi:

Mazkur holatga bevosita B.Farmonov aralashib, ziddiyatli holatni davom ettirib, shu yerda bo‘lgan fuqarolar orasida yolg‘ondan “nima uchun xotinimni urayapsan”, deb IIB boshlig‘iga tashlanib, uning egnidagi xizmat kiyimi tugmalarini uzib, qo‘lini qayirib, uni yerga surib yiqitib, chap qo‘liga jarohat yetkazgan. Bundan foydalangan M.Ro‘ziyeva esa IIB boshlig‘ining qo‘lidagi telefon apparatini tortib olgan.
Qiziq, viloyat IIB rahbariyati shu cho‘pchakka o‘zlari ishonarmikin? Nega unda IIB boshlig‘iga kuch ishlatgan fermer haliyam tarallabedod qilib yuribdi?

“Fermer IIB boshlig‘iga kuch ishlatganini shu yerda bo‘lgan fuqarolar tasdiqlaydi”, — deyishibdi.

Ha, ushbu voqeaga guvoh bo‘lgan Charog‘il QFY raisi Mirjamil Eshmurodov tuman IIB boshlig‘i qo‘l telefonini o‘zi yerga urib sindirganiyu, ko‘zoynagini ham o‘zi uloqtirganini aytib bergandi. IIB yana kuch ishlatib rais fikrini o‘zgartirib, boshqacha talqin qilayotgan bo‘lmasa, albatta.

Qashqadaryo viloyati IIB raddiyasi so‘ngida hozirgi vaqtda tuman prokuraturasi tomonidan mazkur holat yuzasidan tergovga qadar tekshiruv harakatlari hamda viloyat IIB tomonidan esa xizmat tekshiruvi o‘tkazilayotganini yozibdi. O‘ylaymizki, prokuratura tez orada haqiqatni oydinlashtiradi.

Izoh
Asosiy yangiliklar
Mahalliy
Andijonda sodir etilgan mudhish qotillik yuzasidan mahalla mas’ullari va hudud noziriga nisbatan xizmat tekshiruvi tayinlangan — Bosh prokuratura
Mahalliy
O‘zbekiston internetda mualliflik huquqlarini himoya qilishga oid xalqaro bitimni tasdiqladi
Mahalliy
Ozarbayjon aviakompaniyasi Bokudan Samarqandga to‘g‘ridan to‘g‘ri reyslarni yo‘lga qo‘yadi