Toshkent axborot texnologiyalari universitetining Telekommunikatsiya fakulteti bitiruvchisi Hojiakbar Botirov bir vaqtda 3 ta xorijiy universitetga qabul qilindi, deb xabar bermoqda Sputnik.
U Erasmus+ dasturi doirasida Aston universiteti (Buyuk Britaniya), Université Paris-Saclay (Fransiya) va Afina universiteti (Gretsiya)da grant asosida magistraturada o‘qish imkoniyatini qo‘lga kiritdi.
Botirov Hojiakbarning ta’kidlashicha, u dastur haqida do‘stidan eshitganidan keyin rasmiy saytdan mos dasturlarni qidira boshlagan. Uning asosiy e’tiborini ma’lumotlar uzatish tizimlari hamda “SMARTNET” dasturi tortgan, chunki u O‘zbekistonda hali integratsiyalashmagan mavzular va texnologiyalarni o‘z ichiga olgan.
“Mening eng muhim maqsadim — eng yaxshi talabalar qatorida bo‘lish va amalda katta ma’lumotlarni qayta ishlash tizimini o‘rganish. Bo‘lajak ishtirokchilar uchun barcha kerakli hujjatlarni oldindan tayyorlashni va universitet o‘quv dasturidan tashqari loyihalarda va kurslarda qatnashishga harakat qilishni maslahat beraman”, — degan Hojiakbar.
Ma’lumot uchun, Erasmus+ Yevropa Ittifoqining loyihasi bo‘lib, hamkorlikdagi turli tadbirlar, ta’lim, yoshlar bilan ishlash, sport kabi sohalarga oid loyihalarni qo‘llab-quvvatlaydi.
Izoh (0)