Fransiyada faoliyat olib borayotgan o‘zbekistonlik tadbirkor Buxoroning eski shahrida turistik axborot markazini yaratadi
17 yildan buyon Fransiyada faoliyat yuritib kelayotgan buxorolik yosh tadbirkor Saidjon Maqsudov Buxoroning eski shahrida qahvaxona va turistik axborot markazi binosini qurishni mo‘ljallagan. U 2018-yilda Buxoro shahar hokimiga yer maydoni ajratishni so‘rab murojaat qilgan va o‘z loyihasini taqdim etgan.
Buxoro viloyati Turizmni rivojlantirish departamenti direktori Furqat Xo‘jayevning bildirishicha, Buxoroga tashrif buyurgan har bir sayyoh, albatta, o‘zi yaqindan tanishmoqchi yoki borib ko‘rmoqchi bo‘lgan obida va qadim me’moriy yodgorliklar, sayyohlik marshrutlari haqida batafsil ma’lumot olishni istaydi. Ayni paytda faoliyatini shunday maqsadga qaratgan zamonaviy turistik axborot markazi Buxoro uchun juda zarur. Shu ma’noda xususiy investor va tadbirkor tomonidan taqdim etilgan loyiha o‘lkada turizmni rivojlantirishda katta ahamiyat kasb etadi.
Turizm shahri sanalgan Buxoroyi sharifning shaharsozlik normalariga to‘g‘ri keladigan, sayyohlar va mahalliy aholi ehtiyoji uchun zarur bo‘lgan tadbirkor loyihasi mutasaddi rahbarlar tomonidan qo‘llab-quvvatlangan. Obyektning qurilish va obodonlashtirish ishlariga bevosita mutasaddi tashkilotlar, jumladan, respublika Madaniyat vazirligiga qarashli Madaniy meros obyektlarini muhofaza qilish va ulardan foydalanish ilmiy ishlab chiqarish bosh boshqarmasi, shahar arxitektura va qurilish bosh boshqarmasi, davlat sanitariya-epidemiologiya nazorati markazi shahar bo‘limi, yer tuzish ko‘chmas mulk kadastri davlat korxonasi, qolaversa, viloyat “Suvoqava” DUK, shahar elektr tarmoqlari, hududiy gaz ta’minoti korxonalari va yong‘in xavfsizligi boshqarmasidan xulosalar olingan.
Daraxtlar kesilmagan, restoran uchun yerto‘la qazilmagan
Madaniy meros obyektlarini muhofaza qilish va ulardan foydalanish ilmiy ishlab chiqarish bosh boshqarmasi boshlig‘i Suhrob Boboyevning bildirishicha, loyiha qurilishi “Nodir Devonbegi” madrasasiga salbiy ta’sir ko‘rsatmaydi. Hudud tadbirkor tashabbusidan keyin Bosh boshqarma mutaxassislari va boshqarma qoshidagi Restavratsiya va muhofaza qilish ilmiy-metodik kengashi a’zolari tomonidan atroflicha o‘rganilgan va ma’qullangan. O‘zbekiston Prezidentining 2017-yil 19-maydagi PQ-2980-sonli “2017–2019-yillarda Buxoro viloyati va Buxoro shahrining turizm salohiyatini jadal rivojlantirish chora-tadbirlari to‘g‘risida”gi qarori asosida loyiha uchun 120 kvadrat metrdan iborat yer maydoni ajratilgan.
— Bahouddin Naqshband va Mehtar Anbar ko‘chalari kesishmasi hududidagi foydalanilmaydigan zaxira yerlari hisobidan ajratilgan yer maydonida qahvaxona va turistik axborot markazi qurishni mo‘ljallaganmiz. 120 kvadrat metr hajmdagi yer maydonida loyihani amalga oshirish uchun ishga kirishganimizga bir necha kungina bo‘ldi. Biroq, troll.uz sahifasi orqali tarqalgan “Fransiyadan investor bo‘lishga da’vo qilayotgan bir aqlli odam, sayyohlik ma’lumot markazi bahonasida u yerda kafe qurishga qaror qildi. Tabiiyki, u daraxtlarni kesadi” degan noo‘rin iddao bilan chiqqan. Shunga qaramasdan, biz ortga chekinmadik. Bundan tashqari, ajratilgan yer maydoni yerto‘la uchun qazib ham tashlangan emas. Hatto, yerto‘lali restoran qurish haqida reja tuzish tugul, bu haqda o‘ylab ham ko‘rmaganmiz, — dedi yosh tadbirkor Saidjon Maqsudov.
Bino tiklanishi uchun 200 ming yevro sarflanadi
“Daryo” muxbiri tomonidan ijtimoiy tarmoqlarda tarqalgan holat o‘rganildi. Yashil maysa bilan qoplangan maydon atrofi bannerlar bilan o‘rab olingan. Qahvaxona va turistik axborot markazi binosini tiklash uchun birorta daraxt yoki qadimiy obidaga shikast yetkazilmagan. Ushbu manzilda sanoqligina daraxt bor. Ularning bir nechta qurigan shoxlarigagina sanitar shakl berilgan. Bu borada buyurtmachi sifatida viloyat ekologiya va atrof-muhitni muhofaza qilish boshqarmasiga murojaat qilingan.
Qahvahona va turistik axborot markazi binosi uzog‘i bilan 4–5 oy ichida qurilib, foydalanishga topshirilishi mo‘ljallangan. Tadbirkor buning uchun yetarlicha sarmoyaga ega. Barpo etilishi mo‘ljallanayotgan obyekt uchun xususiy investor hisobidan 200 ming yevro mablag‘ sarflanishi ko‘zda tutilgan.
Ma’lumotga ko‘ra, barpo bo‘layotgan bino shimol tomonidan Bahouddin Naqshband ko‘chasi bilan, sharq va janub tomonlardan – shaxsiy bino bilan, g‘arb tomonidan – ichki yo‘l bilan chegaralangan.
— Bino ishga tushgach, turli xorij tillarida bemalol so‘zlay oladigan, zamonaviy texnologiyalardan xabardor o‘n nafarcha yoshlarning ish bilan bandligi ta’minlanadi, — dedi tadbirkor Saidjon Maqsudov. — Shu o‘rinda aytib o‘tishim kerakki, Parijning uch kvartalida Buxoro sharafiga nomlangan va ukam Suhrobjon bilan birgalikda Nationale chayxana de Bukhara deb nomlangan milliy taomlar restoranimizni ochishga erishganmiz. Fransiyalik xalqaro maslahatchi Tunis Yuterjik loyihalarimning yaqin hamkorlaridan. Loyihaning eng kichik elementigacha chuqur o‘ylanib, xalqaro standartlarga mos ravishga keltirilgan. Buxoro turistik salohiyatni yanada oshirish yo‘lida xizmat qiladigan katta-katta maqsadlar yotibdi uning zamirida. O‘ylaymizki, bu mo‘jaz manzil — Buxoroga keladigan o‘zbekistonlik va xorijlik sayyohlar uchun juda ajoyib sovg‘a bo‘ladi.
