Demokratiya va inson huquqlari instituti rahbari Sayyora Xo‘jayevaga uylari “snos”ga tushgan, ammo pulini ololmagan rishtonliklar murojaat qildi
O‘zbekiston Demokratiya va inson huquqlari instituti rahbari Sayyora Xo‘jayeva Facebook’dagi sahifasida Farg‘ona viloyati Rishton tumanidagi uy buzilishlari yuzasidan unga murojaatnoma kelib tushganini ma’lum qildi.
Murojaatnoma Rishton tumani Oq-yer qishlog‘i A.Temur ko‘chasida yashovchi fuqarolardan kelib tushgan.
“Viloyat hokimligi boshchiligidagi rahbarlar va tuman hokimligi ishchi guruhi mutasaddilari … tinch yashab turgan aholini hech qanday oldindan ogohlantirmasdan turib, Ramazon oyining 15-kunidan boshlab xalqning tinchligini buzdilar va qo‘shimcha ishchi guruhini viloyat bo‘yicha yig‘ib, maxsus texnikalar yordamida uylar buzib tashlandi”, — deyiladi hujjatda.
Qayd etilishicha, buzilishdan oldin har bir xonadonga baholash firmalari kelib, xalqning uyini baholagan. Qurilish materiallari davlat tomonidan ta’minlanishi, “snos” pullari to‘lanishi va’da qilingan. Endi esa “snos” pullari ham berilmayapti, arzon narxlardagi qurilish materiallari ham yo‘q. Moddiy yordam sifatida 10 million so‘m berilgan, xolos.
“Farg‘ona viloyati, Rishton tumani bo‘yicha mana shunday ma’lumot bugun Daryo — Live’da e’lon qilindi: “Rishtondagi voqealarning qisqa xronikasi. Tuman hokimi ishdan olindi ,..aytishlaricha, hozirda uyi buzilganlarga barcha kompensatsiyalar to‘liq berilib, ularga uy-joy qurish ishlari ketmoqda”.
Ammo, bu vajlar yolg‘on ekanligi mana bu, bizga kelgan murojaatnomadan va hozirgina telefonda Rishton tumanidan kelgan xabarga qaraganda, kompensatsiyalar to‘liq berildi degan ma’lumot, YoLG‘ON ekanligi ma’lum bo‘ldi! Kimni Farg‘ona viloyati hokimi aldayapti? Velosipedda yurib, populizm bilan shug‘ullanish o‘rniga, aholining pulini to‘liq bermaydimi?” — deya vaziyatga o‘z munosabatini bildirgan Sayyora Xo‘jayeva.
