“Bo‘linish fikri Zohiddan chiqqan”. Shohrux “Ummon” guruhining bo‘linib ketish sabablari haqida gapirdi (video)

Bo‘linib ketgan “Ummon” guruhining yakkaxon xonandasi sifatida faoliyat yuritayotgan Shohrux “Daryo” internet-nashri uchun eksklyuziv intervyu berdi. Intervyuni jurnalist Feruz Muhammad tashkillashtirdi.

Suhbat davomida Shohrux “Ummon” guruhining bo‘linib ketish sabablari haqida ochiq-oydin gapirib berdi.

Ko‘pchilik PR deb o‘yladi. O‘zimiz ham PR bo‘lishini juda xohlaganmiz. Sentabr oyida konsert qo‘yishni ham rejalashtirgan edik. ‘Ummon’ guruhining bo‘linib ketishining aniq sababi, oxirgi paytlarda bir-birimizni tushunmay qoldik, fikrlarimizni hurmat qilmay qo‘ygandik.  10 yil birga bo‘ldik, 10 yilning ichida juda ko‘p qiyinchiliklar ko‘rdik. Oxirgi yillarda esa hamma o‘zining ishi bilan bo‘lib ketdi. Bir-birimizdan uzoqlashib ketdik. Asl sababi ham shunda.

Fikrlarimizga qarshi chiqishni boshladik, shundan keyin o‘rtamizda ziddiyatlar boshlandi. Jasur va men oilali bo‘ldik. Oilali bo‘lgandan keyin insonga ko‘p narsa kerak bo‘ladi. Oddiy narsalarni talashadigan bo‘lib qoldik.

Zohid menga birinchi marta guruhdan chiqishini aytganda u bilan birga o‘tirib gaplashgan edim. Lekin Zohid allaqachon qaror qabul qilib bo‘lgan edi. ‘O‘rtoq, bu narsani o‘ylaganimda mazam qochib qoldi. Men har tomonlama o‘yladim. Seni, Jasurni, muxlislarni, guruhni o‘ylab qaror qabul qildim. Hammamiz alohida ijod qilamiz. Agarda to‘ylar yoki konsertlar bo‘lib qolsa birga boraveramiz’, dedi. Men ham ‘Mayli, menga farqi yo‘q’ deb javob berdim. To‘g‘risini aytsam bularni yana eslagim kelmayapti. Ammo shuni aytmoqchimanki, biz hozir ham ko‘rishib turamiz, munosabatlarimiz to‘xtab qolgani yo‘q.

Shohrux, “Ummon” guruhi yakkaxoni