O‘zbekistonning barcha hududlarida bo‘lgani kabi Andijon viloyatida ham oliy o‘quv muassasalarining bakalavriat ta’lim yo‘nalishi bo‘yicha test sinovlari boshlandi. Imtihonlar viloyat ixtisoslashtirilgan olimpiya zaxiralari maktab-internati hamda Andijon davlat universitetining xorijiy tillar fakulteti sport inshootida o‘tkazilmoqda. Bu haqda “Daryo” muxbiri xabar bermoqda.
— Prezidentimizning joriy yil 17-iyundagi “2019/2020 o‘quv yilida O‘zbekiston Respublikasining oliy ta’lim muassasalariga o‘qishga qabul qilishning davlat buyurtmasi parametrlari to‘g‘risida”gi qaroriga muvofiq davlat imtihonlarini test betalofat va ko‘tarinki kayfiyatda o‘tkazish maqsadida abituriyentlar va ularning ota-onalari uchun barcha sharoitlar yaratildi, — deydi viloyat hokimining o‘rinbosari O‘tkirbek Shukurov. — Test sinovlari o‘tkaziladigan binolarga borish yo‘nalishlarida yo‘l ko‘rsatkichlari o‘rnatilib, har bir hududda test sinovlari jarayoni uchun zarur axborot, texnik, tibbiy va maishiy sharoitlar yaratilishiga jiddiy ahamiyat berildi. Xususan, abituriyentlarning hudud tashqarisidagi va ichkarisidagi to‘planish joylarida soya-salqin joylar – maxsus soyabonlar, “mikroklimat” tizimi tashkil etildi. Test sinovlari o‘tkaziladigan hududlarda tibbiy navbatchilik yo‘lga qo‘yildi. Binolar kuzatuv kameralari va shaxsni identifikatsiyalash vositalari bilan jihozlandi.
Davlat test markazi viloyat bo‘limi taqdim etgan ma’lumotlarga ko‘ra, viloyatdagi oliy ta’lim muassasalariga kirish uchun 75 261 nafar abituriyent ro‘yxatdan o‘tgan. Ularning 53 941 nafari kunduzgi, 21 320 nafari sirtqi ta’lim shakliga hujjat topshirgan. Bu ko‘rsatkich o‘tgan yilga nisbatan 24 525 nafar yoki 48,3 foizga ko‘paygan.
Qabul ko‘rsatkichi bo‘yicha bir o‘ringa Andijon mashinasozlik institutining Iqtisodiyot yo‘nalishiga 44,6, ADU Tarix yo‘nalishiga 41,6, Pedagogika va psixologiya yo‘nalishiga 38, Ekologiya va atrof muhit muhofazasi yo‘nalishiga 34,3, jismoniy madaniyat yo‘nalishiga 34,5 tani, o‘rtacha hisobda esa bir o‘ringa 13,6 tani tashkil etgan.
Andijonda test sinovlari 14-avgustga qadar davom etadi.
Izoh (0)