O‘zbekistonda ilk marotaba smartfonga o‘rnatilgan dastur yordamida sug‘oriladigan ekinlar holati, qachon va qancha suv berish kerakligi aniqlanib, zarur amaliyotlar bajariladi. Dalalardagi ekinlar va bog‘larni tomchilatib sug‘orishni endi joriy etilgan kompyuter texnologiyalari orqali boshqarsa bo‘ladi. Bu haqda “Daryo”ga jurnalist Nargis Qosimova ma’lum qildi.
Andijon viloyatida Yevropa Ittifoqi va Germaniya hamkorlik tashkiloti (GIZ) qo‘shma loyihasi doirasida suv resurslarini boshqarish bo‘yicha irrigatsiya tizimlari suv xavzalari vakillariga intensiv bog‘larni sug‘orishda suvni tejovchi yangi texnologiyalardan foydalanishni o‘rgatishga yo‘naltirilgan seminar-treningda ana shu mobil dasturdan foydalanish qoidalari o‘rgatildi.
— Norin-Qoradaryo irrigatsiya havzasi boshqarmasining 6 gektarlik bog‘dorchilik namoyish uchastkalari an’anaviy egatlash, yomg‘irlab, tomchilab sug‘orish bo‘yicha uchta qismdan iborat. Aynan tomchilab sug‘orishda filtrash, o‘g‘itlash tizimlari avtomatlashtirilib, kompterlashtirilgan. Uchastkaga kichik meteostansiyalar qo‘yilib, ular dalaning holati, namgarchiligi, qachon sug‘orish kerakligi haqidagi xabarni uyali aloqa telefoniga o‘rnatilgan dasturga jo‘natadi. Sug‘orishni aynan ana shu telefondagi dastur orqali uzoqdan turib ham boshqarish mumkin. Dalalarni suvni yo‘qotishsiz, iqtisod qilgan holda mobil dastur orqali boshqarib, sug‘orish ilk marotaba amalga oshiriladi, — deydi Norin-Qoradaryo irrigatsiya tizimlari havza boshqarmasi boshlig‘ining birinchi o‘rinbosari Shuhrat Ergashev.
AQShda tahsil olib, malaka oshirgan agronom Shuhrat Abrorov trening qatnashchilari bilan daraxtlar hosildorligini oddiy usulda oshirish, qay vaqtda shakl berish, butash, hosilni saqlab qolish yo‘llari borasidagi bilimlari bilan o‘rtoqlashdi.
An’anaviy usuldan ko‘ra yangi texnologiya bilan sug‘orishda 60 foizgacha suv iqtisod qilinadi. Mutaxassislarning fikriga ko‘ra, eng afzal usul tomchilatib sug‘orish bo‘lib, uni boshqarish bo‘yicha kiritilayotgan yangi texnologiya ham suvni, ham fermerning vaqtini tejaydi.
Andijon viloyatida o‘tkazilgan mazkur seminar-trening loyiha doirasidagi bunday anjumanning ikkinchisi bo‘lib, birinchisi Namangan viloyati bog‘bonlari uchun o‘tkazilgan edi. Joriy yil 2- avgust kuniga qadar yangi texnologiyadan foydalanish borasidagi bilimlar trening shaklida loyihaga kirgan Farg‘ona, Sirdaryo, Qashqadaryo va Surxondaryo viloyatlari irrigatsiya tizimlari suv havzalari vakillariga ham yetkaziladi.
Izoh (0)