Saida Mirziyoyeva milliarder Alisher Usmonovning rafiqasiga minnatdorlik bildirdi
O‘zbekiston Axborot va ommaviy kommunikatsiyalar agentligi direktori o‘rinbosari Saida Mirziyoyeva Instagram’dagi sahifasida post qoldirdi. Unda Moskvada o‘tkazilayotgan o‘smirlar o‘rtasida badiiy gimnastika bo‘yicha jahon chempionatiga to‘xtalib o‘tgan va milliarder Alisher Usmonovning rafiqasi Irina Viner-Usmonovaga minnatdorlik bildirgan.
Mamlakatimiz terma jamoasini kuni kecha Moskvada ochilgan va tarixda birinchi bor o‘tkazilayotgan o‘smirlar o‘rtasidagi badiiy gimnastika bo‘yicha jahon chempionatida ishtirok etayotgani bilan qutlayman.
O‘zbekiston sharafini 13—15 yoshli qizlarimiz — Komila Abdullayeva, Nilufar A’zamova, Madina Ernazarova, Mumtozabonu Ishoqzoda, Madina Yunusova, Taxmina Ikromova va Yasmina Rahimova himoya qilmoqda.
Yetuk murabbiylar Tatyana Kun, Valeriya Grudnyak, Ra’no Muhamedova, Yelena Aslanova va Irina Kudryasheva munosib sportchilarni — bo‘lajak Olimpiya chempionlarini tayyorlaganiga ishonchim komil hamda ushbu musobaqa ularning faoliyati va hayotida tarixiy bo‘lishiga umid qilaman.
Foto: Instagram
Omad sizga, aziz hamyurtlar!⠀Bunday ajoyib tadbirni yuqori darajada tashkil etgani uchun Irina Viner-Usmonovaga alohida minnatdorlik bildiraman!⠀Bu yerda men ko‘p karra jahon va Yevropa chempionlari, egizak opa-singillar – maftunkor Dina va Arina Averinalar bilan tanishdim.
Saida Mirziyoyeva
Ma’lumot uchun, Moskvada o‘smir qizlar o‘rtasida bo‘lib o‘tayotgan badiiy gimnastika bo‘yicha jahon chempionatida dunyoning 60 dan ortiq davlatidan kelgan sportchilar ishtirok etmoqda. Ular ham individual dasturda, ham jamoaviy mashqlar bo‘yicha bahs olib boryapti.
Izoh (0)