O‘zbekiston Bosh vaziri Abdulla Aripov boshchiligidagi delegatsiya “Beyneu — Akjigit — O‘zbekiston chegarasi” xalqaro avtomagistralining tantanali ochilish marosimida ishtirok etdi. Bu haqda O‘zA xabar bermoqda.
Ikki mamlakat hukumatlari rahbarlari boshchiligidagi delegatsiya, quruvchi-mutaxassislar, keng jamoatchilik va ommaviy axborot vositalari xodimlari qatnashgan tadbirda mazkur xalqaro ahamiyatga molik yo‘lning qayta ta’mirlanib, foydalanishga topshirilishi mamlakatlarning qardoshlik va yaxshi qo‘shnichilik munosabatlari tobora mustahkamlanib borayotganidan dalolat ekani ta’kidlandi.
Avtomobil yo‘lining uzunligi 84 kilometrni tashkil etadi. Mazkur yo‘lni rekonstruksiya qilish va uni Qoraqalpog‘istonning Ustyurt platosi orqali o‘tuvchi xalqaro avtomobil yo‘l bilan tutashtirish uchun 108 million AQSh dollarlik mablag‘ yo‘naltirildi.
“Beyneu—Akjigit—O‘zbekiston chegarasi” avtomagistrali mamlakatlarning iqtisodiyoti yuksalishi va o‘zaro tovar ayirboshlash hajmining ortishiga xizmat qiladi. O‘zbekistonning Qozog‘iston orqali shimoliy va shimoli-g‘arbiy yo‘nalishlar — Boltiqbo‘yi va Yevropa mamlakatlariga chiqishda, shuningdek, dengiz bo‘yi mamlakatlari bilan bog‘lanishida muhim ahamiyat kasb etadi.
Izoh (0)