Chiqindi isiga burkanayotgan Registon

Joriy yilda Samarqand shahrida an’anaviy “Sharq taronalari” XII xalqaro musiqa festivali bo‘lib o‘tadi. Ayni paytda festivalga qizg‘in tayyorgarlik ko‘rilmoqda. Biroq festivalning asosiy qismi o‘tkaziladigan Registon maydoni ayni paytda ko‘rimsiz hol va badbo‘y isga burkanib bormoqda.

“Daryo” muxbiri turistlar zavq bilan tomosha qiladigan, “Sharq taronalari” XII xalqaro musiqa festivali o‘tkaziladigan Registon maydonidagi bugungi ahvolni o‘rgandi.

“Sharq taronalari” XII xalqaro musiqa festivali boshlanishiga bir oydan ko‘proq vaqt qoldi. Ammo bugungi kunda Registon maydonining ahvolini ko‘rgan kishining ichi achiydi. Har kuni minglab xorijiy va mahalliy sayyohlar tashrif buyuradigan ansamblning plitalari (kafellari) qo‘porilib tushgan. Ayrimlari o‘rnatilgan joydan chiqib, qiyshiq holda qotib qolgan. Shunday tarixiy joyga mutaxassis ustalar o‘rniga “mardikor” olib kelib ishlatgandan so‘ng bundan ortiq nimani ham kutish mumkin?

Registon maydonining holatini o‘rganish mobaynida qiziq bir holatga duch keldik. Avvallari Tillakori maqbarasiga yaqinlashaversangiz mayin shabboda dilingizga iliqlik baxsh etardi. Afsuski bugun ushbu shabbodaga chiqindining qo‘lansa isi aralashib kishi ta’bini xira qiladigan darajaga kelgan.

Registon ansamblining obodonlashtirish brigadasi boshlig‘i Ahror Sanaqulovning aytishicha, “Maroqand obod” davlat unitar korxonasi maydon atrofidagi chiqindilarni olib ketishga mas’ul etib belgilangan. Biroq korxona rahbarlari o‘z vazifasiga mas’uliyatsizlik bilan yondashib kelmoqda.

– “Maroqand obod” korxonasiga qo‘ng‘iroq qilib charchadik. Dushanba kunidan boshlab qo‘ng‘iroq qilishini boshlaymiz. Erta-indin deb haftaning oxirida yakshanba kuni kelib, yordamga odam so‘raydi, — deydi Registon ansambli direksiya hisobchisi Dilfuza Mansurova. – Shartnoma bo‘yicha bitta reysga 3,5 tonna chiqindi olib ketishi kerak. Buning uchun 234 700 so‘m to‘lovni amalga oshiramiz. Biz hamma to‘lovlarni oldindan to‘lab qo‘yganmiz. Biroq ular chiqindini olib ketishni doimo paysalga soladi.

Dilfuza Mansurovaning aytishicha, Registon maydoni delegatsiya keladigan obyekt hisoblanganligi bois “Maroqand obod” DUK haftada ikki marotaba chiqindini olib ketishi kerak. Ammo korxona xodimlari faqat yakshanba kuni kelib chiqindilarni olib ketarkan. Natijada bir hafta ichida to‘plangan chiqindilardan badbo‘y is chiqa boshlaydi.

– Samarqand shahridagi chiqindilarni “Maroqand obod” korxonasi olib ketadi. Sababi ushbu korxona 400 ming tonna chiqindini qayta ishlash bo‘yicha Fransiya taraqqiyot agentligi loyihasini qo‘lga kiritgan, — deydi Samarqand viloyati Ekologiya va atrof-muhitni muhofaza qilish boshqarmasi “Toza hudud” davlat unitar korxonasi rahbari Zafar Yusupov.

Ma’lumot o‘rnida aytib o‘tish joizki, 11-iyul kuni Samarqand viloyati hokimligida madaniy meros obyektlarini muhofaza qilish va ulardan foydalanishda qonun talablariga rioya etish yuzasidan yig‘ilish o‘tkazilgan. Unda madaniy meros obyektlarida olib borilayotgan restavratsiya jarayonida, obyektlar hududini obodonlashtirish jarayonida, Samarqandga tashrif buyurayotgan mehmonlar va turistlarga zaruriy shart-sharoit yaratish borasidagi ishlarda yo‘l qo‘yilayotgan xato-kamchiliklar tanqid qilingan.

Yig‘ilish davomida atrof muhitni muhofaza qilish sohasida va tizim boshqaruvida qo‘pol xatoliklarga yo‘l qo‘yganligi uchun viloyat ekologiya va atrof muhitni muhofaza qilish boshqarmasi boshlig‘i G‘olib Negmatov hamda Registon ansamblini ta’mirlash va undan foydalanish mustaqil direksiyasi direktori Marufi Bexruz Raufzoda egallab turgan vazifasiga noloyiq deb topilib ishdan olib tashlangan.