O‘zbekiston BMTning Inson huquqlari bo‘yicha kengashi a’zoligiga 2021—2023 yillar davrida saylanish uchun nomzodini ilgari surmoqda. Bu haqda Inson huquqlari bo‘yicha milliy markaz matbuot xizmati ma’lum qildi.
Shu munosabat bilan “O‘zbekiston Respublikasining inson huquqlari sohasidagi ko‘ngilli majburiyatlari” loyihasi ishlab chiqildi. Toshkentda ushbu loyihaning muhokamasi bo‘yicha milliy maslahatlashuv bo‘lib o‘tdi.
Tadbirda Oliy Majlis Senati a’zolari va Qonunchilik palatasi deputatlari, siyosiy partiyalarning parlament quyi palatasidagi fraksiyalari a’zolari, Vazirlar Mahkamasi, Oliy sud, Konstitutsiyaviy sud, turli vazirlik, tashkilot va muassasalar vakillari hamda fuqarolik jamiyati institutlarining faollari qatnashdi.
Milliy maslahatlashuv ishtirokchilari e’tiboriga “O‘zbekiston Respublikasining inson huquqlari sohasidagi ko‘ngilli majburiyatlari” loyihasi taqdim etildi.
Loyihada keyingi davrda O‘zbekistonning inson huquqlarini rag‘batlantirish va himoya qilish sohasida erishgan yutuqlari, xalqaro majburiyatlar va kelishuvlarning milliy darajada ro‘yobga chiqarilishi bo‘yicha qo‘lga kiritilgan natijalar, inson huquqlarini ta’minlashning xalqaro va mintaqaviy tuzilmalari bilan hamkorligi samaralari qayd etilgan.
Eng asosiysi, loyihada O‘zbekiston BMTning Inson huquqlari bo‘yicha kengashi a’zoligiga saylansa, 2021—2023 yillarda amalga oshirishi ko‘zda tutilayotgan ko‘ngilli majburiyatlari sanab o‘tilgan. BMT talabi bo‘yicha uchta asosiy yo‘nalishda – xalqaro, mintaqaviy va milliy darajalarda bajarilishi mo‘ljallangan ushbu ixtiyoriy vazifalar ro‘yxati bir qancha banddan iborat.
Izoh (0)