Marg‘ilonda o‘tkazilgan “Buyuk ipak yo‘li” xalqaro folklor musiqa festivali yakunlandi. Bu haqda “Daryo”ga festival mutasaddilari ma’lum qildi.
Festivalning yakuniy bosqichi g‘oliblariga tashkiliy qo‘mita tomonidan diplomlar, sovrinlar va festival ramzlari tushirilgan esdalik sovg‘alari topshirildi. 1-o‘rin g‘olibi 3500, 2-o‘rin g‘oliblari 2500, 3-o‘rin g‘oliblari 1500 AQSh dollari miqdoridagi pul mukofotlari bilan taqdirlandi.
Shuningdek, eng yaxshi natija ko‘rsatgan jamoalarga turli nominatsiyalar bo‘yicha pul mukofotlari va qimmatbaho sovg‘alar topshirildi.
Festivalda Italiya, Germaniya, Fransiya, Kanada, Janubiy Koreya, Malayziya, Rossiya, Hindiston, Turkiya, Tojikiston, Qozog‘iston, Turkmaniston, Qirg‘iziston, Yaponiya, Eron, Polsha, Mo‘g‘uliston, Daniya kabi 20 ga yaqin davlat hamda O‘zbekistonning barcha hududlaridan kelgan san’at ustalari, folklor jamoalari, badiiy ansambllar ishtirok etdi.
Festival doirasida folklor san’ati yo‘nalishida ilmiy izlanish va tadqiqotlar olib borayotgan 40 ga yaqin olim va mutaxassislar ishtirokida “Buyuk ipak yo‘lida folklor san’atining rivojlanish jarayonlari” mavzuida xalqaro ilmiy–amaliy konferensiya o‘tkazildi.
Yangi tashkil etilgan “Farg‘ona press klubi”ning navbatdagi sessiyasi Ijodkorlar bog‘ida o‘tkazildi. Press klubda chet ellik ijodkorlar va olimlar ishtirokida “San’atlar uyg‘unligida folklorning o‘rni” mavzusi muhokama etildi. Unda Koreya, Yaponiya, Eron, Hindiston, Tojikiston, Turkiya kabi mamlakatlardan kelgan folklorshunos mutaxassislar, yakka ijrochilar va dastalarning vakillari qatnashdi.
Marg‘ilonning qadimiy maskanlaridan biri bo‘lgan Said Ahmad Xo‘ja Eshon madrasasida “Qarg‘alar uchsa qaraylik…” deb nomlangan spektakl namoyish etildi.
Festivalning tantanali yopilish marosimida vazirlik va idoralar rahbarlari, diplomatik korpus vakillari va xorijlik mehmonlar ishtirok etdi.
Izoh (0)