Yangiqo‘rg‘on tumanlararo iqtisodiy sudining 2018-yil 26-dekabrdagi sud buyrug‘iga ko‘ra Namangan viloyat “Qishloqichimliksuv” MChJdan “Barokat himmat fayzi” xususiy korxonasi foydasiga 1 milliard 211 million so‘m undirish belgilangandi. Bu haqda “Daryo”ga MIB matbuot xizmati ma’lum qildi.

Foto: Kosonsoy MIB

Mazkur ijro hujjatini ijrosini ta’minlash maqsadida byuroning Kosonsoy tuman bo‘limi ish yurituvida tegishli chora-tadbirlar amalga oshirildi. Xususan, davlat ijrochisi tomonidan qarzdorning bankdagi hisob raqamiga inkasso topshiriqnomasi qo‘yilib, tegishli mol-mulklari borligi aniqlandi.

Asosiysi, ijro harakatlari davomida xatlangan qarzdorga tegishliligi aniqlangan 3 ta ko‘chmas mulk binoci elektron onlayn auksion savdosiga joylashtirilishi to‘g‘risida ogohlantirilgandan so‘ng “Barokat himmat fayzi” xususiy korxonasiga 1 milliarddan ortiq mablag‘ni to‘lab berdi.

Bundan tashqari, 15.232.618 so‘m ijro yig‘imi ham undirilib, ijro harakati tamomlandi.