Bugun, 12-iyul kuni Oliy Majlis Senati Mudofaa va xavfsizlik masalalari qo‘mitasida Ichki ishlar vazirligi faoliyatining 2019-yil birinchi yarim yilligida amalga oshirilgan ishlari to‘g‘risidagi hisobotiga bag‘ishlangan majlisi bo‘lib o‘tdi. Bu haqda “Daryo” muxbiri xabar berdi.

Foto: “Daryo”

Tadbirda senatorlar, qo‘mita rahbarlari, IIV tizimi vakillari ishtirokida sohaga oid bir qator masalalar muhokama qilindi. Jumladan, IIV vaziri o‘rinbosari Rustam Xotamov so‘nggi vaqtlarda ko‘pchilikni qiziqtirgan bodi-kameralar va yo‘llardagi nazorat kameralari yuzasidan ham qisqacha izoh berib o‘tdi.

Foto: “Daryo”

 

Hamisha yo‘lda yuramiz, bugun ijtimoiy tarmoqlarda ham juda katta masalalar ko‘tarilyapti; kameralar, bozorlarning oldilari tartibga solinishi xalqni quvontiryapti, katta o‘zgarishlar bo‘lyapti, bu yaxshi. O‘zimiz ham kuzatib boryapmiz, xizmatga yosh-yosh yigitlar kelishyapti. Ammo haligacha yo‘l patrul xizmati xodimlari qoidabuzarlar bilan uchastka yoki bo‘limga bormasdan guruh-guruh bo‘lib muhokama qilib turishadi. Bu masalani tartibga solishga, qonunlarni ishlashiga senatormi, deputatmi umuman olganda hech birimiz befarq bo‘lmasligimiz kerak. Masalan, o‘zim ertalab ishga chiqib ketaman. Qibray yo‘lida guruh-guruh bo‘lib turishganini ko‘raman. Albatta, kameralar joriy etilishi yordam beradi. Shu masalada ham tushuncha bersangiz.

Bahodir Tojiyev, Senatning agrar, suv xo‘jaligi masalalari va ekologiya qo‘mitasi raisi

Foto: “Daryo”

Joriy yilning 1-iyulidan boshlab joriy etilishi lozim bo‘lgan bodi-kameralar joylashuvi bo‘yicha qarorimiz texnik sabablarga ko‘ra 2020-yilning yanvar oyiga qadar surilyapti. Shu bilan birgalikda, siz tilga olgan xodimlarning dislokatsiya masalasiga o‘tadigan bo‘lsak, har kungi yo‘riqnomada xodimlarning qayerda xizmat o‘tashlari belgilanadi va bu  Yo‘l harakati xavfsizligi boshqarmasi tomonidan nazoratga olinadi. Lekin vaziyatdan kelib chiqib qaysi joylarda yo‘l tanqisligi bo‘lib qolsa yoki yo‘llarda harakatlanish muammolari yuzaga kelgan taqdirda, ularning yo‘nalishlari, albatta, o‘zgartirib boriladi. Barcha hududlarda kuzatuv kameralarini qo‘yish masalasi ilgari surilgan. Buning natijasida YHX hamda yo‘l-patrul xizmati xodimlarining ishtiroki keskin kamayadi, lekin birdaniga emas. Chunki hamma tizim joriy etilgani yo‘q, sekin-sekin maqsadga erishib boriladi. Yana bir narsani qo‘shimcha qilib aytmoqchimanki, Ichki ishlar organlari tizimida Kadrlar Bosh boshqarmasi, o‘zining xavfsizlik xizmati tizimlari borki, bular bilan doimiy ravishda yo‘l-patrul xizmati, profilaktika inspektorlari, boshqa sohaviy xizmat xodimlari ustidan nazorat olib boramiz. Profilaktik tadbirlarimiz va tarbiyaviy ishlarimiz natijasida IIVning ta’margirlikka qarshi kurash bo‘yicha choralari tufayli o‘tgan yilning shu davriga nisbatan, xodimlar tomonidan amalga oshirilgan jinoyatlar soni 2 baravarga kamayishiga erishildi. Ayni ishlar kelgusida yanada kuchaytiriladi.

Rustam Xotamov, Ichki ishlar vaziri o‘rinbosari