9-iyul kuni nishonlik M.Y. tuman IIB Tergov bo‘limi katta tergovchisi To‘lqin Beknazarovga ishini o‘z foydasiga hal qilib berish sharti bilan 965 ming so‘m pulni pora tariqasida berayotgan vaqtida Departamentning Nishon tumani bo‘limi xodimlari, tuman prokuraturasi hamda viloyat IIB O‘XB bo‘limi xodimlari tomonidan qo‘lga olindi. Bu haqda “Daryo”ga Nishon tuman IIB ma’lum qilmoqda.
Ma’lum bo‘lishicha, Tallimarjon shaharcha “Do‘stlik” mahallasida joylashgan uylardan birining egalik huquqi nishonlik M.Y.ning otasi hamda yana bir fuqaro O.R. o‘rtasida mojaroli bo‘lib kelayotgan edi. Mazkur ish bo‘yicha Nishon tumani IIB tergov bo‘linmasi katta tergovchisi To‘lqin Beknazarov tomonidan tergovga qadar tekshiruv harakatlari olib borilayotgan bo‘lgan.
M.Yu. tergovchidan ishni otasining foydasiga hal qilib berishni so‘raydi va agar shunday qilsa, bu xizmatini quruq qo‘ymasligini bildiradi.
Natijada M.Y. Bosh prokuraturasi huzuridagi Iqtisodiy jinoyatlarga qarshi kurashish departamenti Nishon tuman bo‘limi, tuman prokuraturasi hamda tuman IIB xodimlari tomonidan o‘tkazilgan tezkor tadbirda tergovchiga uning xizmat xonasida 965 ming so‘m pulni bergan vaqtida qo‘lga olingan.
Ayni paytda M.Yu.ga nisbatan O‘zbekiston Respublikasi Jinoyat kodeksining 211-moddasi (Pora berish) 1-qismi bilan jinoyat ishi qo‘zg‘atilgan.
Izoh (0)