Jizzaxning Mirzacho‘l tumanida muqaddam 3 yilga qamalib chiqqan L.To‘ychiyev va uning jinoiy sherigi E.Ixlosov (ism-shariflar o‘zgartirilgan) giyohvandlik vositasini saqlash, sotish kabi jinoyat sodir etgani yuzasidan sud hukmi o‘qildi. Bu haqda Jinoyat ishlari bo‘yicha Mirzacho‘l tuman sudi matbuot xizmati xabar berdi.
Ma’lum bo‘lishicha, L.To‘ychiyev E.Ixlosov bilan marixuana giyohvand moddasini chekib, oldida bo‘lgan tanishi Iqbol, Farhod va I.Ne’matovani ham giyohvandlik moddasini iste’mol qilishga jalb qilgan hamda marixuana giyohvandlik moddasini chekgan.
Shundan keyin L.To‘ychiyev Iqbol ismli tanishiga 800 000 so‘m evaziga og‘irligi 619 gramm quritilgan faol giyohvand moddani sotayotganda Mirzacho‘l tuman IIB xodimlari tomonidan qo‘lga olingan.
L.To‘ychiyevning uyi tintuv qilib ko‘rilganida, umumiy og‘irligi 2 kilogrammdan ortiq bo‘lgan marixuana giyohvandlik vositasini saqlab kelganligi aniqlangan.
Jinoyat ishlari bo‘yicha Mirzacho‘l tuman sudi L.To‘ychiyevni Jinoyat kodeksining tegishli moddalarida nazarda tutilgan jinoyatlarni sodir etganlikda aybdor deb topib, 10 yil 6 oy muddatga ozodlikdan mahrum etdi. Jazoni qattiq tartibli koloniyada o‘tashi belgilandi.
E.Ixlosovni esa JK 274-moddasi 2-qismining “v” bandida nazarda tutilgan jinoyatni sodir etganlikda aybdor deb topdi, biroq uni 53 yoshga kirganligini va boshqa holatlarni inobatga olib 3 yil muddatga ozodlikdan mahrum etib, jazoni manzil-koloniyalarda o‘tashi belgilandi.
Izoh (0)