Braziliya terma jamoasi Kopa Amerika—2019 musobaqasining finalida Peruni mag‘lubiyatga uchratdi (3:1).
FIFAning Twitter’dagi rasmiy sahifasida xabar berilishicha, braziliyalik Alisson musobaqaning eng yaxshi darvozaboni deya e’tirof etildi.
“Liverpul”ning 26 yoshli posboni musobaqada 6 ta uchrashuvda maydonga tushib, o‘z darvozasidan atigi bitta gol o‘tkazdi. Final bahsida Peru hujumchisi Paolo Gerrero penaltidan Alisson darvozasini ishg‘ol qildi, xolos.
Alissonning quruq o‘yinlar seriyasi 889 daqiqani tashkil etdi. U terma jamoa hamda klub safida 4-may kunidan buyon 9 ta o‘yinda darvozasi daxlsizligin saqlab qoldi. O‘shanda Alisson Angliya Premyer ligasi doirasida “Nyukasl” bilan kechgan bahsda o‘z darvozasidan 2 ta to‘p olib chiqqandi. Hisob esa 3:2 ko‘rinishida “Liverpul” foydasiga hal bo‘lgandi.
Dani Alves esa musobaqaning eng yaxshi o‘yinchisi bo‘ldi. 36 yoshli braziliyalik musobaqada 6 ta o‘yin o‘tkazib, 1 ta gol urishga muvaffaq bo‘ldi.
“Gremio” hujumchisi Everton Soares musobaqaning eng yaxshi to‘purariga aylandi. Uning hisobida 6 ta o‘yinda 3 ta gol hamda 1 ta assist mavjud.
Ma’lumot uchun, braziliyaliklar 2007-yildan buyon ilk bor, tarixda esa 9-marotaba mazkur musobaqada g‘olib bo‘ldi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)