6-iyul kuni G‘ijduvon tumanida Gentra va Cobalt ishtirokida sodir bo‘lgan avtohalokat yo‘l harakati qoidalarini buzish oqibatida ro‘y bergan.
Buxoro viloyat IIB matbuot xizmatining “Daryo”ga bergan rasmiy ma’lumotiga ko‘ra, Lacetti Gentra rusumli, 80M 027 MA davlat raqam belgili avtomashina egasi, fuqaro M.A. yo‘l harakati qoidasini buzgan holda G‘ijduvondagi “Zarangari” MFYdan o‘tuvchi 4R-48-avtomobil yo‘li bo‘ylab harakatlangan. Yo‘lning 270-kilometriga yetganda, salonida 6 kishi bo‘lgan o‘z boshqaruvidagi avtomashinani qarama-qarshi tomonga olib o‘tgan. Oqibatda o‘z yo‘nalishi bo‘ylab to‘g‘ri harakatlanayotgan Cobalt rusumli, 85 950 OAA davlat raqam belgili fuqaro R.A.ga tegishli avtomashinaning old qismiga urilib, yo‘l-transport hodisasini sodir qilgan. Ikki avtomashina o‘z yo‘nalishida kelayotgan navbatdagi Cobalt’ga zarb bilan urilgan. Mudhish to‘qnashuv sodir bo‘lgan vaqtning o‘zida 2 haydovchi hamda 1 nafar yo‘lovchi vafot etgan.
Avtomashinalardagi boshqa yo‘lovchilar, ya’ni 8 nafar kishi esa o‘ta og‘ir tan jarohati bilan G‘ijduvon tuman Tibbiyot birlashmasi jonlantirish bo‘limiga yotqizilgan.
7-iyulning tungi soat 22:00 dan keyin yana bir nafar o‘ta og‘ir ahvoldagi 2013-yilda tug‘ilgan bola dunyodan o‘tgan.
— Tungi 22:00 da reanimatsiya bo‘limida bolaning yuragi to‘xtab qoldi. Barcha tezkor muolajalarni ko‘rsatib, qayta tikladik. Bu hol 4–5 marta takrorlandi. Yurak to‘xtab-urib turdi. Organizmi yosh, yurak yashashga tashna, baquvvat, afsuski miya to‘qimalaridagi og‘ir jarohat o‘lim holati bilan yakunlandi. Yana bir nafar 2013-yilda tug‘ilgan Sh.A., miya komasi 3-daraja, miya shishi va bosh miyaning yopiq jarohati tashxisi bilan yotqizildi. 1967-yilda tug‘ilgan bemor ayol H.R.ning esa ensa suyagi singan, yelka suyagining uchdan bir yuqori qismi singan, peshonasidan olgan zarb yumshoq to‘qimalar jarohati va miya shishiga olib kelgan. Quloq qismidan qon tomayapti. O‘ta og‘ir holatdagi bu ikki bemor hayoti uchun barcha malakali shifokorlar jalb etilgan. Bundan tashqari, poytaxtdan tajribali nevrareamotolog va bolalar miya jarrohligi bo‘yicha shifokorlar ham chaqirilgan, — dedi Respublika Shoshilinch tibbiy yordam ilmiy markazi Buxoro filiali tez tibbiy yordam va favqulodda vaziyatlarda tez tibbiy xizmatni tashkil qilish bo‘yicha direktor o‘rinbosari Oybek Ro‘ziyev.
Avtohalokat sodir bo‘lgan kun o‘ta og‘ir jarohat olgan 8 nafar yo‘lovchi-bemor hamda voqea joyida vafot etgan 3 nafar fuqaro jasadi G‘ijduvon tuman Shoshilinch tez tibbiy yordam markaziga keltirilgan.
— Shu kuni 8 nafar bemor o‘ta og‘ir jarohat bilan tuman Shoshilinch tibbiy yordam markazi jonlantirish bo‘limiga olib kelingan. Kerakli barcha zaruriy laboratoriya amallari bajarildi. Zudlik bilan tibbiy yordam ko‘rsatildi. 3 nafari yana shoshilinch ravishda Respublika Shoshilinch tibbiy yordam ilmiy markazi Buxoro filialiga olib ketildi. Qolgan besh nafardan birining ahvoli barqarorlashtirilib, operatsiya stoliga olindi. Bemor ilgari jigar serroziga uchragan va bir necha yildan buyon davolanib ham kelayotgan ekan. Ustiga-ustak, avtoto‘qnashuv tufayli bemorning ham jigari ezilgan, ham qo‘li singan. Bundan tashqari, bosh qismi yirtilgan, yelkalari singan, xullas, jarohatlari ko‘p. Qolgan to‘rt nafar bemorlar ham turli jarohatlar olgan. Ayni paytda sog‘ligi tiklangan va ular o‘rta og‘ir ahvolda. Bu bemorlar olgan jarohatida esa yashash uchun xavf tug‘diruvchi salbiy oqibat yo‘q. Har biri alohida nazoratda, — dedi G‘ijduvon tuman Tibbiyot birlashmasi rejali xirurgiya bo‘limi mudiri Otamurod Mardonov.
Mazkur holat bo‘yicha to‘plangan hujjatlarga ko‘ra, Buxoro viloyati IIB huzuridagi Tergov boshqarmasi tomonidan holat yuzasidan O‘zbekiston Respublikasi JKning 266-moddasi 3-qismi “a” bandi (transport vositalari harakati yoki ulardan foydalanish xavfsizligi qoidalarini buzish odamlar o‘limiga sabab bo‘lishi) bilan jinoyat ishi qo‘zg‘atilgan. Hozirda jinoyat ishi bo‘yicha dastlabki tergov harakatlari olib borilmoqda.
Izoh (0)