Farzandining kontraktini ish haqidan to‘laganda soliq imtiyozi qanday bo‘lishi haqidagi ma’lumotlarni huquqshunos Xushnudbek Xudoyberdiyev o‘z Telegram-kanalida ma’lum qildi.
Uning ta’kidlashicha, yangi Soliq kodeksi loyihasida kontrakt to‘lovi uchun o‘tkazilgan ish haqining soliqqa tortilmasligiga oid imtiyoz bekor qilinishi aytilgan, ammo Soliq kodeksining yangi tahriri hali rasman tasdiqlangani yo‘q.
“Eshitishimga qaraganda, ayrim buxgalterlar ushbu imtiyoz bekor qilinganini aytishmoqda ekan. Bu noto‘g‘ri. Hozir amalda bo‘lib turgan Soliq kodeksining 179-moddasining 31-bandida ushbu imtiyoz belgilab qo‘yilgan”, — deydi u.
Bundan tashqari, mabodo kimdir o‘zining yoki 26 yoshga to‘lmagan farzandining kontraktiga plastik kartochkasi orqali to‘lagan va buning natijasida soliq imtiyozi qo‘llanmagan bo‘lsa, unda soliq organlariga ariza bersa, ushlanmagan soliq miqdorini hisoblab, qaytarib beriladi.
Shuningdek, yangi Soliq kodeksida yosh oila a’zolari tomonidan olingan ipoteka kreditlarni hamda qishloq joylarda namunaviy loyihalar bo‘yicha yakka tartibda uy-joy uchun olingan ipoteka kreditlarini qoplash uchun yo‘naltirilgan daromadlarga ham soliq imtiyozini bekor qilish rejalashtirilmoqda, ammo ushbu imtiyozlar ham ayni bugungi kunda kuchga ega.
Izoh (0)