Markaziy bank raisi boshchiligidagi O‘zbekiston delegatsiyasi 3—5-iyul kunlari Sankt-Peterburg shahrida bo‘lib o‘tgan Xalqaro moliya kongressida (XMK-2019) ishtirok etdi. Bu haqda Markaziy bank matbuot xizmati ma’lum qildi.
Xabar berilishicha, tadbir har yili moliya bozoridagi barcha muhim ishtirokchilarni va ekspertlarni, xususan, xorijiy regulyatorlar rahbarlari, xalqaro moliya tashkilotlari va yirik bank vakillarini birlashtiradi.
Kongressning bu yilgi mavzusi “Moliya bozorlari: qiyinchiliklarning kuchayishi, barqarorlikni ta’minlash” bo‘ldi. Xabarda aytilishicha, tadbir dasturining sessiyalari global moliyaviy tizimning barqarorligi va iqtisodiy o‘sishga ta’siri, pul-kredit siyosatining dolzarb muammolari, bank sektorini tartibga solish va bank nazorati modelidagi o‘zgarishlar, sug‘urta bozori va moliyaviy bozorlarni rivojlantirishga qaratildi.