Farg‘ona viloyatining Quva tumanidagi “Paxtakor” MFY “O‘zbek” ko‘chasida yashovchi bir guruh fuqarolar iste’molchilar huquqlarini himoya qilish jamiyatlari federatsiyasiga murojaat qilgan. Bunga “Suvoqava” DUK Quva filiali tomonidan ichimlik suvi bo‘yicha asossiz ravishda qarzdorlik hisoblanayotganligi sabab bo‘lgan. Bu haqda “Xalq so‘zi Online” ma’lum qildi.
Ushbu holat yuzasidan tekshiruvlar olib borilganda, hududda istiqomat qiluvchi fuqarolar toza ichimlik suvini uzoqdan tashib kelishlari ma’lum bo‘lgan.
Aniqlanishicha, 131 nafar iste’molchi korxona kompyuter bazasiga ichimlik suvi iste’molchisi sifatida kiritilgan va ularga 2019-yil 1-may holatiga 33 676 402 (o‘ttiz uch million olti yuz yetmish olti ming to‘rt yuz ikki) so‘m qarzdorlik hisoblangan.
Federatsiya tomonidan “O‘zbek” ko‘chasida yashovchi iste’molchilarga “Suvoqava” DUK tomonidan hisoblangan 33 676 402 so‘m qarzdorlikni hisobdan chiqarishga erishildi, deyiladi xabarda.