Toshkentda ikki piyodani urib yuborgan haydovchiga 3 yil muddatga axloq tuzatish ishlari jazosi tayinlandi
Toshkentda 1995-yil tug‘ilgan haydovchi “Asrobod” mahallasi bekatida yo‘lni kesib o‘tayotgan ikki piyodani urib yubordi. O‘zAning xabar berishicha, voqea yarim tunda sodir bo‘lgan. Oqibatda ulardan biri shifoxonaga olib ketilayotganda, ikkinchisi operatsiya stolida vafot etgan.
Jinoyat ishlari bo‘yicha Sergeli tumani sudi sudyasi G‘afur Omonov sudlanuvchi B.M. o‘sha voqeadan keyin u ehtiyot chorasi sifatida qamoqqa olinganini ma’lum qilgan. U “Yo‘l harakati qoidalari”ning 11-qismi “g” bandi, 77-bandi 1 va 3-qismlari talablariga rioya qilmasdan harakatlanishi natijasida yo‘lni kesib o‘tayotgan ikki piyodani urib yuborgan.
Sud tibbiyot ekspertizasining xulosalariga ko‘ra, fuqarolar yo‘l-transport hodisasi oqibatida o‘lgani aniqlangan.
Ushbu jinoyatni sudda ko‘rib chiqish asnosida sudlanuvchi aybiga to‘liq iqror bo‘lgan.
Sud hukmiga ko‘ra, sudlanuvchiga 3 yil muddatga transport vositalarini boshqarish huquqidan mahrum qilinib, ish haqining 30 foizini davlat daromadi hisobiga ushlab qolgan holda 3 yil muddatga axloq tuzatish ishlari jazosi tayinlangan.
Shuningdek, sud ushbu talablaridan kelib chiqib, sudlanuvchiga Jinoyat kodeksi 45-moddasini qo‘llab, transport vositalarini boshqarish huquqidan mahrum qilish tarzidagi qo‘shimcha jazo tayinladi.
