Qozog‘iston fuqarosi La-Mansh bo‘g‘ozini 14 soat ichida suzib o‘tdi

Olmaotalik yurist Erjan Yesimxanov La-Mansh bo‘g‘ozini suzib o‘tdi, deb xabar beradi Tengrinews.

Qozog‘iston fuqarosiga 34 kilometr masofani suzish o‘tish uchun 14 soat-u 21 daqiqa kerak bo‘ldi. Erjan Yesimxanovning so‘zlariga ko‘ra, u La-Manshdan suzib o‘tgan birinchi qozoq hisoblanadi. Buning ustiga u asosan kechasi suzib o‘tgan.

“Bugun Angliyadan La-Mansh orqali Fransiyaga suzib o‘tib, Qozog‘iston bayrog‘ini Fransiya qirg‘og‘ida baland ko‘tardim”, — deb yozadi Erjan o‘zining Instagram’dagi sahifasiga.

“Men gidrokastyumda suzaman. La-Manshdan rasman suzib o‘tishda gidrokastyumdan foydalanilmaydi, ammo men hech qanday rekordlarga da’vo qilmayman, shunchaki o‘zim uchun suzaman. La-Mansh orqali suzib o‘tayotgan insonlarni tajribali mutaxassis ishtirokidagi muxsus kema kuzatib boradi. Uning vazifasi — eng qisqa traektoriya orqali qirg‘oqqa olib borish, shunda ham masofa 33,5 kilometrdan kam bo‘lmaydi. Kanalni suzib o‘tayotganingizda qayiqqa teginish taqiqlanadi”, — deydi Erjan Yesimxanov.

Insoniyat tarixida La-Manshni birinchi bor 1875-yili Mettyu Uebb 21 soat-u 45 daqiqada suzib o‘tgan. Birinchi ayol esa 1926-yilda 14 soat-u 39 daqiqada suzib o‘tishga muvaffaq bo‘lgan. Erkaklar o‘rtasidagi rekord avstraliyalik Trent Grimsga tegishli bo‘lib, uning natijasi 6 soat 55 daqiqani tashkil etadi.