O‘zbekistonda gemodializ xizmati markazlari barpo etiladi. Buni Sog‘liqni saqlash vazirligi, Moliya vazirligi va Davlat-xususiy sheriklikni (DXSh) rivojlantirish agentligi Xalqaro moliya korporatsiyasi ko‘magida amalga oshiradi.
DXSh agentligi matbuot xizmatidan ma’lum qilishlaricha, gemodializ klinikasini DXSh asosida rivojlantirish uchun 10 dan ortiq yirik xorijiy investorlar qiziqish bildirmoqda. Xalqaro moliya korporatsiyasi ushbu loyihaning asosiy maslahatchisi sifatida ishtirok etmoqda.
Bundan tashqari, Sog‘liqni saqlash vazirligi bilan hamkorlikda mahalliy investor ilgari surayotgan sterilizatsiya xizmatini DXSh asosida loyihalashtirish tashabbusi o‘rganib chiqilmoqda. Bunday xizmatni joriy qilish jihozlardan yuqishi mumkin bo‘lgan ko‘pgina kasalliklarni oldini oladi.
O‘zbekiston tibbiyot tizimida dolzarblik kasb etib turgan onkologiya yo‘nalishida DXSh asosida loyiha berilmoqda. Tender asosida amalga oshiriladigan bu jarayonda dunyoning yirik korxonalari qatnashish istagini bildirmoqda. Jumladan, onkologiya sohasidagi DXSh loyihasini amalga oshirish bo‘yicha Yevropaning yirik kompaniyalari qiziqish bildirmoqda.
Bundan tashqari, Toshkentda ayrim shifoxonalarni tez orada mahalliy investor va Sog‘liqni saqlash vazirligi hamkorligidagi DXSh loyihasiga aylantirish rejalashtirilgan. Ular orasida insultdan keyingi reabilitatsiya markazi bo‘lishi rejalashtirilayotgan loyiha ham bor. Agar loyiha amalga oshiriladigan bo‘lsa ushbu markazda 200 nafar bemor reabilitatsiya xizmatlarini olish imkoniga ega bo‘ladi.
Izoh (0)