Samarqanddagi Universitet xiyoboni daraxtlari pasportlashtirilmoqda

Samarqanddagi Universitet xiyobonidagi jami 233 ta daraxt inventarizatsiyadan o‘tkazilgan. Bu haqda Samarqand viloyati Ekologiya va atrof muhitni muhofaza qilish boshqarmasi matbuot xizmati “Daryo”ga ma’lum qildi.

– Bugungi kunda 233 ta daraxtning 139 tasi raqamlanib tablichkalar o‘rnatildi. Tablichkalarga daraxtning nomi, yoshi va diametri to‘g‘risida ma’lumot yozib qo‘yildi, — deydi matbuot xizmati rahbari Sanjar Sadullayev. – Qolgan mayda daraxt va butalar ham inventarizatsiya qilindi. Biroq ular hali yosh bo‘lganligi uchun raqamlanmadi. Qolgan 94 daraxtga ham tablichkalar tayyorlanmoqda.

Ma’lumot uchun, 1870-yilda qurilgan 1400 metr uzunlikka ega bo‘lgan xiyobonning 180 metrida aholi va mehmonlarni madaniy dam olishini mazmunli tashkil etish maqsadida obodonlashtirish ishlari olib borilmoqda.

Eslatib o‘tamiz, 18-iyun kuni Samarqand viloyat hokimi Erkinjon Turdimov jurnalistlar bilan uchrashib, Samarqand shahridagi Universitet xiyobonining asl qiyofasini o‘zgartirmagan holda obodonlashtirish ishlari olib borilishini, xiyobondagi har bir daraxt alohida raqamlanib pasportlashtirilishini bildirgan edi.