O‘zbekiston Bosh prokurorining buyrug‘iga asosan Nodirbek Boytemirov Ichki xavfsizlikni ta’minlash boshqarmasi boshlig‘i lavozimiga tayinlandi. Bu haqda Bosh prokuratura matbuot xizmati xabar berdi.
Nodirbek Boytemirov 1973-yilda tug‘ilgan, ma’lumoti oliy, huquqshunos. 1995-yilda Toshkent davlat yuridik institutini tamomlagan.
Prokuratura organlaridagi ish faoliyatini 1995-yilda Farg‘ona shahar prokuraturasining ish o‘rganuvchisi sifatida boshlab, prokuratura organlarida turli lavozimlarda, jumladan, Bosh prokuratura ichki xavfsizlikni ta’minlash inspektsiyasi boshlig‘i, Xorazm viloyati prokurorining birinchi o‘rinbosari sifatida faoliyat olib borgan.
Tayinlangunga qadar Oliy Majlis Senati devoni bo‘lim mudiri lavozimida ishlagan.
Sodiqjon Nazarov esa Bosh prokuraturasi Kadrlar boshqarmasi boshlig‘i lavozimiga tayinlandi.
Sodiqjon Nazarov 1961-yilda tug‘ilgan, ma’lumoti oliy, huquqshunos. 1985-yilda Toshkent davlat universitetini tamomlagan.
Prokuratura organlaridagi ish faoliyatini 1992-yilda Sirdaryo tumani prokurorining yordamchisi lavozimida ish o‘rganuvchi sifatida boshlab, Sharof Rashidov, Xovos, Sardoba, Sayxunobod tumanlari prokurori, Bosh prokuratura va Sirdaryo viloyat prokuraturasining turli lavozimlarida faoliyat olib borgan.
Tayinlangunga qadar Sirdaryo viloyati prokuraturasi fuqarolik sud ishlarini yuritishda prokuror vakolatini ta’minlash bo‘limi prokurori lavozimida ishlagan.
Shuningdek, Shavkatjon Rahimov Qishloq xo‘jaligi sohasida qonunchilik ijrosi ustidan nazorat boshqarmasi boshlig‘i, Sodiqjon Berdialiyev Ichki ishlar organlarida qonunchilik ijrosi ustidan nazorat boshqarmasi boshlig‘i lavozimlariga tayinlandi.
Izoh (0)