TATU talabasi yozgi ta’til davrida o‘z uyida vahshiylarcha o‘ldirib ketildi

Muhammad al-Xorazmiy nomidagi Toshkent axborot texnologiyalari universiteti Kompyuter injiringi fakulteti ikkinchi bosqich talabasi A.Sh. 28-iyun tonggi soat 3:45 larda noma’lum ikki fuqoro tomonidan o‘z xonodonida vahshiylarcha pichoqlanib ketilgan. Natijada A.Sh. voqea joyida vafot etgan. Bu haqda TATU matbuot xizmati nomidan “TUIT Online” Telegram-kanalida e’lon qilingan xabarda aytiladi.

Ayni vaqtda Sirdaryo viloyati Guliston tuman IIB tomonidan qidiruv-surishtiruv ishlari olib borilmoqda.

A.Sh. 1997-yilda Sirdaryo viloyati Guliston shahrida tug‘ilgan, millati o‘zbek, 2017-yil Muhammad al-Xorazmiy nomidagi Toshkent axborot texnologiyalari universiteti Kompyuter injiringi fakultetining “Kompyuter injiringi”  yo‘nalishi 1-bosqichiga davlat granti asosida o‘qishga qabul qilingan. A.Sh. shu fakultetda o‘qishi davomida o‘zini ijobiy tomondan ko‘rsata olgan, kursdoshlari orasida hurmat qozongan, har bir darsga jiddiy tayyorgarlik ko‘rib, fanlarni  yaxshi baholarga o‘zlashtirib kelgan. Shu bilan birga, marhum mobil ilovalar yaratish, veb-dizaynerlik, kompyuter grafikasi kabi to‘garaklarga qatnashib kelgan. Shuningdek, u yaqin kunlar ichida IELTS sertifikatini olish uchun sinov imtihoniga tayyorgarlik ko‘rib kelayotgan edi.

Toshkent axborot texnologiyalari universiteti rahbariyati marhum A.Sh. oila a’zolariga chuqur ta’ziya bildirib qolgan.