“Uni qarovsiz, ahvoli ayanchli va o‘ldiga chiqarishdi”. “Kulol va Xurmacha” filmidagi Xurmacha roli ijrochisi Abror Tursunov bilan eksklyuziv intervyu (video)

“Kulol va Xurmacha” filmidagi Xurmacha roli bilan muxlislarga yaxshi tanish bo‘lgan aktyor va rejissor  Abror Tursunov haqida ijtimoiy tarmoqlarda “qarovsiz, yordamga muhtoj, juda ayanchli ahvolda” mazmunidagi xabarlar tarqaldi.

Ushbu xabarlarga oydinlik kiritish maqsadida “Daryo” muxbiri Feruz Muhammad hamda jurnalist va teleboshlovchi Shohira Hamro Abror Tursunovning xonadonida bo‘lib, aktyor bilan suhbatlashishdi.

Suhbat davomida aktyor ijtimoiy tarmoqlarda ikki marotaba vafot etdi deya yolg‘on xabarlar chiqqani, nima sababdan kino olamida faoliyat yuritmayotgani haqida gapirib berdi.

Qiziq voqea bo‘lgan. Bir kuni uyimizga rahmatli Obid Yunusov keldi. ‘Ha Obid aka, tinchlikmi’, desam, ‘senga fotiha o‘qigani keldim’, dedilar. ‘Qayerdan eshitdingiz’, deganimda, ‘menga Mirzabek Xolmedov aytdi’, dedilar. ‘Sog‘ ekansan, salomat ekansan, umring uzoq bo‘ladi’, deb ketdilar.

Undan so‘ng internetga ‘yana bir marta o‘ldi’, deb yolg‘on xabar tarqatishdi. San’atda ko‘rinmasangiz shunaqa bo‘lib qolarkan-da. ‘O‘ldi, yo‘q bo‘lib ketdi, kasal yotibdi’, deyishar ekan.

Abror Tursunov, aktyor

Avvalambor, kasal bo‘ldim. Insult bo‘ldim. Bo‘ynimning ikki tomonidan tomir olishdi. Oyog‘imdan tomir olib, bo‘ynimga qo‘yishdi. Bu hammasi noto‘g‘ri ovqatlanish va siqilishdan kelib chiqar ekan.

Abror Tursunov, aktyor