2019-yil 27-iyunda Oliy Majlis Senat kengashining joriy yil may oyida o‘tkazilgan fuqarolar yig‘inlari raislari (oqsoqollari) saylovi yakunlariga bag‘ishlangan majlisi videoselektor shaklida bo‘lib o‘tdi, deya xabar berdi Senat matbuot xizmati.
Uni O‘zbekiston Respublikasi Oliy Majlisi Senati Raisi Tanzila Norboyeva olib bordi.
Saylov yuqori saviyada o‘tishi uchun barcha zarur sharoitlar bilan ta’minlangani haqida hisobot tinglandi.
Majlis ishtirokchilari tomonidan unda 9093 ta fuqarolar yig‘inida mamlakatdagi ovoz berish huquqiga ega fuqarolarning vakili sifatida 2 million 58 mingdan ortiq kishiva 22264 nafar tavsiya etilgan nomzod bevosita qatnashganligi qayd etildi.
Shunda bir mahalla raisligiga o‘rtacha 2,4 nafardan nomzod to‘g‘ri kelganligi saylovning muqobil asosda o‘tkazilganligidan dalolat beradi.
“Aholi mahallaga bosh bo‘lishdek mas’uliyatli ishni kimga ishonib topshirish masalasiga bu galgi saylovlarda har qachongidan ham jiddiyroq yondashdi. Bu esa saylangan raislarning sifat tarkibi ham yuksaldi, degan so‘zdir.
Natijada 9093 nafar oqsoqol saylanib, ularning 6208 nafari ushbu lavozimlarga birinchi marta saylangan, 57,6 foizi oliy ma’lumotga ega. Saylangan raislarning 11,2 foizi xotin-qizlar, 164 nafari mahalliy kengashlar deputatlaridir.
Bo‘lib o‘tgan saylovning yana bir ahamiyatli jihati shundaki, mahalla oqsoqolligiga bu gal ko‘proq kasbi bo‘yicha o‘qituvchi bo‘lgan insonlar saylandi”, — deyiladi hisobotda.
Shu kunning o‘zida mazkur masalaga doir brifing videokonferensaloqa tarzida o‘tkazildi.
Izoh (0)