O‘zbekiston Respublikasi Fanlar akademiyasida ilm-fan sohasida amalga oshirilayotgan islohotlar holatini o‘rganish natijasida aniqlangan kamchiliklar, ayrim ilmiy-tadqiqot muassasalarining moddiy-texnika bazasi, ilmiy salohiyati bilan bog‘liq muammolarga bag‘ishlangan anjuman bo‘lib o‘tdi. Bu haqda “Xalq so‘zi” xabar qiladi.
Unda Fanlar akademiyasi qoshidagi Yadro fizikasi, Astronomiya, Mikrobiologiya, Genetika va o‘simliklar eksperimental biologiyasi, Matematika, Fizika-texnika, San’atshunoslik institutlari hamda Alisher Navoiy nomidagi Davlat adabiyot muzeyi faoliyati tanqidiy muhokama qilindi. Xususan, ushbu ilmiy-tadqiqot muassasalarining binolari uzoq yillardan beri ta’mirlanmagani, laboratoriya jihozlari ma’nan va jismonan eskirgani, reagent va butlovchi qismlarning yo‘qligi, muassasalar xodimlarining faoliyat yuritishlari uchun zarur sharoitlar yaratilmagani qayd etildi.
— Ilmiy-tadqiqot institutlarining faoliyati ijobiy tomonga o‘zgarishida moliyaviy menejerlar faoliyati katta ahamiyatga ega, — dedi Bosh vazir o‘rinbosari Aziz Abduhakimov. — Olimlarimizning tadqiqotlarini, ilmiy izlanishlarini tijoratlashtirish — bugungi kun talabi. Yurtimizda amalga oshirilayotgan islohotlar natijasida olimlarimizga, ilm-fan sohasi vakillariga alohida e’tibor qaratilayotgan bir paytda ilmiy-tadqiqot muassasalarining eski qolipda ishlashini hech narsa bilan oqlab bo‘lmaydi.
Darhaqiqat, yuqorida sanab o‘tilgan institutlarda turli sabablarga ilmiy muassasaning ma’muriy-tashkiliy ishlarini olib borishda qator kamchiliklarga yo‘l qo‘yilgan. Ilm-fan va ishlab chiqarishning o‘rtasida katta tafovut yuzaga kelib, olimlarning tadqiqotlari natijalari daromad manbai bo‘lmay qolgan.
Mana shu kamchiliklarni tezkor bartaraf etish, muammolarni atroflicha hal qilish maqsadida har bir institut rahbari o‘z muassasasi faoliyatini o‘nglash bo‘yicha takliflar taqdim etishi hamda mazkur muammolarning yuzaga kelishi bo‘yicha tushuntirish berishiga kelishildi.
Shuningdek, har bir ilmiy muassasaning veb-saytini tashkil etish uchun ma’lum miqdorda alohida mablag‘ ajratilishi lozimligi ta’kidlandi. Ilmiy muassasalarining elektron axborot tizimini rivojlantirish orqali aholi qatlamlari orasida ilm-fanni targ‘ib qilish, xorijiy hamkorlar bilan aloqalar o‘rnatish, xalqaro grant va tanlovlarda ishtirok etish imkoniyatlari oshishi alohida ta’kidlandi.
Izoh (0)