Hindiston tomonidan urib tushirilgan sun’iy yo‘ldoshning 41 ta qoldig‘i hamon orbitada qolib, Xalqaro kosmik stansiyadagi kosmonavtlarga xavf tug‘dirmoqda, deb xabar beradi TJournal.

Foto: Wikipedia

Garvard-Smitsonovskiy astrofizika markazining astronomi ma’lumotlariga ko‘ra, sun’iy yo‘ldosh urib tushirilganiga uch to‘lganiga qaramay orbitada haliyam 400 ta qoldiqning 41 tasi aylanib yuribdi. Hindiston hukumati esa barcha chiqindilar bir necha hafta ichida atmosferada yonib ketishini ma’lum qilgandi. Endilikda esa ushbu jarayonlar salkam bir yilni talab qilishi aytilmoqda.

Shu bilan birga astronomlarning tasdiqlashicha, sun’iy yo‘ldoshdan qolgan 24 ta chiqindi yerdan 408 kilometr balandlikdagi Xalqaro kosmik stansiya joylashgan orbitaga qadar ko‘tarilgan.

NASA faqatgina diametri 10 santimetrdan katta bo‘lgan qoldiqlarni kuzatish imkoniga ega, orbitada yana qancha shu turdagi jismlar uchib yurgani hozircha noma’lum.

Hindiston 27-mart kuni o‘zining sun’iy yo‘ldoshini urib tushirgan edi. Mamlakat bosh vaziri Narendra Modi buni “katta muvaffaqiyat” deb atab, Hindiston o‘zini “kosmik derjava” ekanligini isbotlaganini ta’kidlagandi.