Andijon viloyati hokimi Prezidentga “spektakl” qo‘yilgani haqida material yozgan “Daryo” muxbirini taqdirladi
Andijonlik matbaachi, jurnalist va blogerlarning 150 nafari Matbuot va ommaviy axborot vositalari xodimlari kunida viloyat hokimi tomonidan “Faxriy yorliq”, “Tashakkurnoma” va planshetlar bilan taqdirlandi.
Bayram munosabati bilan Andijon shahridagi “Yoshlar markazi”da bo‘lib o‘tgan tantanali tadbirda viloyatda faoliyat olib borayotgan, bosma va elektron ommaviy axborot vositalari xodimlari, nashriyot, pochta va matbuot tarqatuvchi tashkilotlari xodimlari, sohaga aloqador barcha tashkilot va muassasalar vakillari qatnashdi.
Tadbirda viloyat hokimi, Oliy Majlis Senati a’zosi Shuhratbek Abdurahmonov ham ishtirok etdi va soha xodimlarini kasb bayrami bilan qizg‘in qutladi hamda Andijonni har tarafdan yuksaltirish uchun jurnalistlarga tayanishini ma’lum qildi.
Bayram munosabati bilan bir guruh soha fidoyilariga viloyat hokimining Faxriy yorlig‘i va tashakkurnomalari hamda qimmatbaho sovg‘alari topshirildi. Ular orasida “Daryo” nashrining viloyatdagi muxbirlari Mirolim Isajonov va Umidjon Mamarasulovlar ham bor.
Tantana ishtirokchilariga viloyat madaniyat boshqarmasi xodimlari tomonidan konsert dasturi namoyish etildi.
Bayram tadbiri shahardagi “Oltin vodiy” tantanalar saroyidagi to‘kin dasturxon ustida davom etdi.
Eslatib o‘tamiz, “Daryo” muxbiri Mirolim Isajonov bir necha ayollarga bepul kottejlar berish va’dasi berilib, ulardan intervyu olingani, Prezidentning Andijonga tashrifi yakunlangach, ayollar kottejlardan chiqarib yuborilishi holati yuzasidan surishtiruv olib borgandi. Surishtiruvda tilga olingan holatlar keyinchalik Bosh prokuratura tomonidan o‘rganib chiqilib, ko‘zbo‘yamachilikka yo‘l qo‘yilgani o‘z tasdig‘ini topgandi. Bosh prokuratura tomonidan Andijon viloyat hokimi nomiga zudlik bilan aybdor shaxslarning intizomiy javobgarligi masalasini hal qilish hamda bu kabi holatlarga chek qo‘yish choralarini ko‘rish to‘g‘risida taqdimnoma kiritilgandi. Ushbu holat yuzasidan Andijon viloyati hokimligi qanday choralar ko‘rgani hozircha ma’lum emas.
