26-iyun kuni O‘zbekiston Respublikasi Prezidenti Adminstratsiyasi huzuridagi Axborot va ommaviy kommunikatsiyalar agentligida “Bojxona sohasida tadbirkorlar uchun yaratilayotgan qulayliklar” mavzusida matbuot anjumani bo‘lib o‘tdi, bu haqda Axborot va ommaviy kommunikatsiyalar agentligi xabar qiladi.
Tadbirda Davlat bojxona qo‘mitasi raisi o‘rinbosari Baxtiyor Rahimov va boshqa mutasaddilar jurnalistlarga mavzu yuzasidan batafsil axborot berdi.
— 2018-yil 1-dekabrdan boshlab, “sariq” va “qizil” yo‘laklar, 2019-yil 1-martdan boshlab esa “yashil” va “ko‘k” yo‘laklar ishga tushirildi.
— Bojxona nazoratidan inson omili 100 foiz chiqarib tashlangan. Barcha nazorat ishlari elektron shaklda amalga oshirilmoqda.
— Yuk oqimi yuqori bo‘lgan 16 ta avtomobil va temir yo‘l bojxona postlarida 17 ta inspeksion-ko‘rik majmuasi o‘rnatilgan. Chegara bojxona postlarida qo‘l yuklarini nazorat qilish uchun 39 komplekt zamonaviy rentgen apparatlar bilan jihozlangan.
— Inson tanasini skaner qiluvchi zamonaviy skaner qurilmasi sinov tariqasida Islom Karimov nomidagi Toshkent xalqaro aeroportiga o‘rnatildi va ayni vaqtda sinovdan o‘tkazilmoqda. Sinov natijalariga ko‘ra 7 ta holatda qiymati 422,4 mln so‘mlik 1,3 kg zargarlik tilla buyumlari fuqarolarning tana a’zolariga berkitilgan holda olib o‘tish holatlari aniqlandi.
— Bojxona va chegara punktlari orqali aholi o‘tib qaytishlari soni 2018-yil yakuniga ko‘ra 2017-yilga nisbatan 86 foizga oshgan.
— Import bilan shug‘ullanuvchi tadbirkorlar soni 48 foizga, yuk deklaratsiyalari 35 foizga ortgan.
— Vakolatli iqtisodiy operatorlarga bojxona to‘lovlarini 20—60 kungacha kechiktirib to‘lashga ruxsat berilmoqda.
— Qiymati baland avtomobillar uchun bojxona to‘lovi kamaytirilgandan so‘ng 6 oy davomida premium toifaga mansub 600 dan ortiq avtomobil, 20 ta elektromobil O‘zbekiston hududiga olib kirilgan.
— Xorijdan keluvchi avtotransport vositalari uchun bojlar qiymati ham qayta ko‘rib chiqilishi mumkin.
Izoh (0)