Fotoreportaj: Xorijlik sayyohlarni ham o‘ziga rom etayotgan Surxondaryodagi Sangardak sharsharasi
“Daryo” muxbiri Otabek Qo‘ldoshev Surxondaryo viloyatining Sariosiyo tumanida joylashgan Sangardak sharsharasida bo‘lib, nafaqat o‘zbekistonliklarni, xorijliklarni ham hayratga solayotgan tabiat mo‘jizasini suratga oldi.
Sangardak sharsharasi aslida dam olish maskani bo‘lib, sharshara yonida ziyoratgoh ham joylashgan. Ziyoratgoh imom xatibi Faxrulla Habibovning rivoyatlarga tayanib ma’lum qilishicha, sharshara XVI–XVII asrlarda paydo bo‘lgan. Sangardak sharsharasi dong‘i 1991-yildan keyin respublika aholisiga ma’lum bo‘lib, hududlardan tashrif buyuruvchilar soni ko‘paygan.
Sangardak aslida qishloq nomi bo‘lib, sang-tosh so‘zidan olingan bo‘lib tosh o‘rtasidagi qishloq degan ma’noni beradi.
Faxrulla Habibovning aytishicha, sharshara yonida joylashgan ziyoratgohda ayol avliyo yashab o‘tgan.
2017–2018-yillarda Prof-Group MChJ qurilish tashkiloti quruvchilari kuchi bilan sharsharada qurilish ishlari olib borilib, sharsharaga chiquvchi ko‘priklar qurilgan. Ziyoratgoh ta’mirlangan. Mehmonlar uchun qulay va shinam joylar barpo etilgan.
Ayni kunda sharsharaga kuniga 700–800 nafar mehmon tashrif buyurmoqda. Mahalliy aholi vakillari bilan bir qatorda Turkiya, Yaponiya, AQSh, Afg‘oniston, Tojikistondan kabi davlatlardan mehmonlar kelib, hordiq chiqarib qaytmoqda.
