Toshkent shahar IIBB ijtimoiy tarmoqlarda tarqalgan Yunusobod tumani pasport stolida fuqaroning polni artishga majburlangani haqidagi ma’lumotni o‘rgandi.
Ijtimoiy tarmoqlarda idorada yonida yosh bolasi bo‘lgan ayol pol artayotganligi aks etgan surat tarqaldi. Surat ostiga quyidagicha izoh qoldirilgan edi:
“Yunusobod. Pasport stoli. Bugun. 3—4 yoshli bolaning qo‘lidan sharbat tushib ketdi, pasport stoli boshlig‘i esa bolaning onasini tozalashga majbur qilqdi. Uni aynan majburlashdi.. Baland ovozda. Insonning o‘zi bolasi ortidan tozalagani boshqa ish. Yoki shuni to‘g‘ri tushuntirib iltimos qilishsa. Baqirishning nima keragi bor? Afsus, videoga tushirishga ulgurmadik”.Yunusobod tumani migratsiya va fuqarolikni rasmiylashtirish bo‘limi boshlig‘i kapitan Umarov Azizjonning aytishicha, koridorda o‘tib ketayotib yosh bolaning qo‘lidan sharbat tushib ketganligi ko‘rib qolgan. Onasidan bolaga e’tiborliroq bo‘lishini iltimos qilgan. Hech kim pollarni artishni talab qilmagan.
“Vaholanki ona o‘z farzandi ortidan tozalashida men hech qanday qo‘rqinchli narsani ko‘rmayapman. Men faqat bola uloqtirgan chiqindini olib chiqindilar savatiga tashlashini so‘radim” – deydi u.
IIBB xabarida qayd etilishicha, migratsiya va fuqarolikni rasmiylashtirish bo‘limlari shtatida (Boshqarmaning ham) farroshlar yo‘q. Ushbu idoralarda tartib va ozodalik xodimlarning o‘zlari tomonlaridan ta’minlanib boradi.
“Yunusobod tumani MvaFR bo‘limi boshlig‘i holatni yuzasidan bergan izohidan kimdir qoniqmasligi mumkin.
E’londa aytilganidek farzandi ortidan tozalashga “majburlangan” ayolni topishni hali imkoni bo‘lmadi, boisi uning o‘zi pasport masalalari bo‘yicha murojaat qilmagan, hoynahoy kimgadir sherik bo‘lib kelgan.
Ammo MvaFR bo‘limi boshlig‘ining ayol kishi bilan dialogi guvohi bo‘lgan boshqa insonlarni izohlari, kapitan Umarov A.ning gaplari bilan deyarli bir xil bo‘ldi.
Uch kishi mustaqil ravishda xodimning tanbehi (hech kim bu MvaFR bo‘limi bolig‘i bo‘lganligini bilmagan) muloyim bo‘lganligini ta’kidlashdi: ‘Iltimos, bolangizga e’tiborliroq bo‘ling’, deyish bilan birga ayolga qo‘pol muomala qilmadi.
Shuningdek, guvohlarning aytishlariga qaraganda, ayol kishi hojatxona qayerda ekanligini so‘ragan. Javobni eshitgach, uning o‘zi u yerga borib, shvabra va pol lattasini olib kelib pollarni artib qo‘ygan. Agar rasmga e’tiborliroq qarasangiz, ayolning yuzidagi tabassumni payqash mumkin: qo‘pol muomala qilinib va tozalashga majburlangan inson bunchalik bamaylixotir bo‘lib tabassum qilmasa kerak”, deyiladi boshqarma xabarida.
Izoh (0)