Qashqadaryoda o‘tkazilgan Xalqaro press klubning navbatdagi yig‘ilishi “O‘zbekistonda oliy ta’lim tizimi: islohotlarning yangi bosqichi, muammolarning chuqur tahlili va tezkor yechimlar” mavzusiga bag‘ishlandi. Bu haqda O‘zbekiston musulmonlari idorasi matbuot xizmati ma’lum qildi.
Yig‘ilishda Oliy Majlis Senati a’zosi, Termiz davlat universiteti rektori Abduqodir Toshqulov ta’lim tizimiga bog‘liq bo‘lgan muammolar haqida quyidagi fikrlarni bildirdi:
—Yaqinda universitet xalqaro bo‘limi boshlig‘i aytib qoldi. Termiz shahriga Pokiston va Hindistondan 70 nafarga yaqin alloma kelgan. Ular Termizning ulug‘ shahar ekani, bu yerliklar muqaddas zaminda yashashini ta’kidlagan. Biroq ulamolar xalqning yuzi, ko‘ziga boqqanida qalbda ilm sustligini ko‘rganini aytgan. Biz maqbarani chiroyli qilib qo‘ydik, qani al-Hakim at-Termiziy? Qani “Sunani Termiziy”ning keyingi tomlari? Aksariyat hollarda insonlarning ko‘r-ko‘rona ziyoratini yo‘lga qo‘ydik. Yozuv-chizuv, g‘iybat, g‘urbat hamda korrupsiya holatlari ko‘p bo‘lgan. Ustoz-shogirdlar va jamoa o‘rtasidagi hasad ilmiy salohiyatning tushib ketishiga sabab bo‘ldi.
Bunday ma’naviy hastaliklarning ko‘pligiga sabab nima? Men bitta sabab keltiraman. Biz yuz yil davomida oliy ta’limdan Islomni sug‘urib oldik. Halol bilan haromni sug‘urib oldik. Biz Hyoteni o‘rgatdik, lekin janobi Payg‘ambarimiz (s.a.v.) hadislaridan keltirishga cho‘chidik. Islom ma’rifatini faqat imomlar gapirsin dedik, dunyoviy ilm olganlar bu haqda gapirsa ularga boshqacha qaradik.
Izoh (0)