13-iyun kuni taxminan soat 12:30 larda Samarqand tumani, Andijoniy mahallasida joylashgan 30-sonli maktabgacha ta’lim muassasasi oshxonasida maishiy gaz balloni portlashi oqibatida yong‘in vujudga kelgan. Samarqand viloyat FVB YoXB mazkur holatga o‘z munosabatini bildirdi.
“Hozirgi kunda respublikamizning ayrim internet tarmoqlarida o‘rganilmasdan turib, noto‘g‘ri ma’lumotlarni chiqarilishi natijasida fuqarolar o‘rtasida turli fikrlarni paydo bo‘lishiga sabab bo‘lmoqda. Xususan, Samarqand tuman Andijoniy mahallasida joylashgan 30-son maktabgacha ta’lim muassasasida 13-iyun kuni soat 11:31 larda muassasasiga qarashli oshxonaning 20 kvadrat metri yonganligi, natijada portlash sodir bo‘lganligi to‘g‘risida xabarlar tarqaldi. Hatto portlash oqibatida fuqarolar tan jarohati olganligi to‘g‘risida ham yolg‘on ma’lumotlar tarqaldi. Aslida yong‘in sodir bo‘lgan bog‘cha oshxona binosining 18 kvadrat metr shifti, devor qismlari va oshxona buyumlari yongan. Muassasa oshxonasida o‘simlik yog‘i me’yoridan ortiq qizib ketishi natijasida yong‘in sodir bo‘lganligini taxmin qilinmoqda”, — deyiladi viloyat FVB YoXB matbuot xizmati xabarida.
Yong‘indan tan jarohat olganlar va halok bo‘lganlar mavjud emas. Yong‘inni o‘chirishda Samarqand tumani 11-Kasbiylashgan yong‘in o‘chirish qutqaruv qismidan 4-jangovar mashinasi jalb etilgan. Yong‘innni bartaraf etish jarayonida 180 kvadratmetr hajmidagi bino va material boyliklar qutqarib qolingan. Yong‘in sodir bo‘lgan joyda hech bir ishchi xizmatchi va tarbiyalanuvchi bilan bog‘liq baxtsiz hodisa ro‘y bermagan.
FVB YoXBning ma’lum qilishicha, hozirgi kunda yong‘in sodir bo‘lgan joydan 30-son maktabgacha ta’lim muassasasiga qarashli oshxona binosining har joyidan olingan kul, yog‘och qoldiqlari, elektr simlari namunasidan yong‘in sababini aniqlash maqsadida O‘zbekiston Respublikasi Adliya Vazirligi qoshidagi X.Sulaymonova nomidagi Respublika sud ekspertizasiga yuborilgan.
“Ushbu holat yuzasidan ekspertiza tomonidan yuborilgan xulosaga asosida yong‘inni kelib chiqish sababi haqida qo‘shimcha ravishda ma’lumot beramiz”, — deyiladi viloyat FVB YoXB xabarida.
Avvalroq Maktabgacha ta’lim vazirligi ushbu hodisaga munosabat bildirgandi.
Izoh (0)