Kinematografiya sohasiga qo‘shgan ulkan hissasi uchun afsonaviy fransuz aktyori Alen Delon faxriy “Oltin palma novdasi” bilan taqdirlandi, deb xabar beradi “RIA Novosti”.

Foto: Sputnik

Tantanali taqdirlash marosimi 19-may kuni bo‘lib o‘tdi, shundan so‘ng Festivallar saroyida Delon ijrosidagi “Msye Klyayn” (1976-yil) dramasi namoyish etildi.

Aktyor avvalroq bergan intervyusida ushbu mukofotni qabul qilishga o‘ylanayotganini, biroq yakunda uni olib, shu kunga qadar birga ishlagan rejissorlariga hurmat bajo keltirishga qaror qilganini bildirgandi.

Fransiyalik teatr va kino aktyori, rejissor va ssenarist Alen Delon “Rokko va uning aka-ukalari” (1960), “Yorqin quyosh uzra” (1960), “Samuray” (1967), “Shahardagi ikki kishi” (1973) kabi filmlar orqali butun dunyoga tanilgan. Alen Delon “Bizning tarix” filmi uchun “Sezar” hamda xalqaro Berlin kinofestivali faxriy mukofotlarini qo‘lga kiritgan.